परिमार्जन सहित खनालया प्रतिवेदन पारित
नेकपा (एमाले)या अध्यक्ष झलनाथ खनालं पार्टीया पोलिटब्यूरो बैठकय् पेश यानादीगु राजनीतिक प्रतिवेदन परिमार्जन सहित पारित जूगु दु । ताःहाकःगु सहलह व विवाद लिपाः बिहीवाः च्वंगु बैठकं सरकार व माओवादीयात स्वइगु दृष्टिकोणय् परिमार्जन यायेगु सहमति लिपाः वयेकया प्रतिवेदन पारित जूगु खः ।
बिहीवाः च्वंगु एमालेया पोलिटब्यूरो बैठकय् अध्यक्ष खनालं सरकारया नेतृत्व त्याग यायेगु व सत्ता गठबन्धनया कारण पार्टी दक्षिणपन्थी धारय् वंगु धाइगु विश्लेषण चीकेगु प्रतिवद्धता प्वंकेवं प्रतिवेदन पारित जूगु खः ।
गुन्हु न्ह्यः पार्टी ज्याकू बल्खुइ शुरु जूगु पोलिटब्यूरो बैठकय् अध्यक्ष खनालं राष्ट्रिय सहमतिया निंतिं सरकारया नेतृत्व नं त्याग यायेमा:गु बिचाः सहित प्रतिवेदन न्ह्यब्वयादीगु खः । वयेकलं बैठकय् थम्हं पार्टीं सरकारया नेतृत्व त्वतेमाःगु पाखे संकेत मयानाःगु धयादिसें पार्टीया नेतृत्व बल्लाकेमाःगु धयादिल ।
बैठकं विधानया शुद्धिपत्र व नियमावलीयात अन्तिम रुप बीत महासचिव ईश्वर पाखरेलया संयोजकत्वय् न्याम्ह दुजः दुगु कार्यदल गठन याःगु दु । कार्यदलय् नेतात विष्णु पौडेल, रामचन्द्र झा, पृथ्वीसुब्बा गुरुङ व वेदुराम भुसाल दुजः कथं च्वनादीगु दु । अथेहे बैठकं राजनीतिक गतिरोध अन्त्यया निंतिं मंकाः प्रस्तावया मस्यौदा दयेकेगु जिम्मा नेतात भरतमोहन अधिकार, विष्णु पौडेल व रघुपन्त स्वम्ह दुजः दुगु कार्यदलयात ब्यूगु दु ।
