'ज्ञान व अनुसन्धानया व्यवस्थापनय् ग्वाहालि आवश्यक'
राष्ट्रपति डा. रामवरण यादवं विकासोन्मुख देय्या विकासया निंतिं ज्ञान व अनुसन्धान व्यवस्थापनय् ग्वाहालि अभिबृद्धि यायेमाःगु खँय् बः बियादीगु दु ।
एसियन इन्स्टीच्यूट अफ टेक्नोलोजी (एआइटी) व एल्मुनाई एसोसिएसन नेपाल (आइट्टा-नेपालं) मंकाः रुपं ग्वसाःग्वःगु 'दिगो विकासया निंतिं ज्ञान व्यवस्थापन' विषयस अन्तर्राष्ट्रिय सम्मेलनया उल्लेज्या यानादसें राष्ट्रपति यादवं दिगो विकास सम्बन्धी क्षमता अभिबृद्धिलय् अनुभव व ज्ञानया कालाबिला यायेत ग्वाहालि जुइगु विश्वास प्वंकादिल ।
ज्याझ्वलय् एआइटीया अध्यक्ष सैद इरानदस्टं एसियाया दिगो विकासया निंतिं ऊर्जा, शिक्षा, सतक पूर्वाधार निर्माण यायेत एआइटीं ग्वाहालि अप्वयेकाः न्हू नेपाः निर्माणया निंतिं गुणस्तरीय शिक्षा व चीचीधंगु उद्योगया विकासय् ध्यान बीमाःगु खँ बः बियादिल ।
अथेहे आइट्ट-नेपालया संस्थापक अध्यक्ष लक्ष्मणप्रसाद घिमिरे, ग्वसाः खल आइट्ट-नेपालया अध्यक्ष रमेशराज विष्टं नेपाःया दक्ष प्राविधिक जनशक्ति निर्माणय् एआइटीया योगदान महत्वपूर्ण दुगु धयादिसें दीक्षित जनशक्तिया ज्ञानयात एकीकृत रुपं छ्यलेफुसाः नेपाःया विकासय् ग्वाहालि जुइगु बिचाः प्वंकादिल ।
स्वन्हु तक न्ह्याइगु सम्मेलनय् झिंन्यागू देय्यात स्वसः स्वयां अप्वःसिनं ब्वति कयाच्वंगु दु । थुगु सम्मेलनय् थीथी विषयलय् खुइप्यंगू कार्यपत्र पेश याइगु ज्याझ्वः दु ।
