प्रधानन्यायाधीशय् शर्माया नां सर्वसम्मत
संवैधानिक परिषदया बैठकं प्रधानन्याधीशया निंतिं शिफारिस याम्ह वरिष्ठ अधिवक्ता अनुपराज शर्माया नां संसदीय सुनुवाई विषेश समितिं सर्वसम्मतं अनुमोदन याःगु दु ।
बिहीवाः च्वंगु संसदीय सुनुवाई विषेश समितिलया बैठकं शर्माया नां सर्वसम्मत यायेधुंकाः वयेकलं भ्रष्टाचारं देय्या दक्वं क्षेत्रय् व्याप्त जूगु व न्यायालयलय् नं भ्रष्टाचार दुगु स्वीकार यानादिसें वयेकलं भ्रष्टाचार र्निमूल यायेत थम्हं कुतः यायेगु व थुकी दक्वं पक्षया ग्वाहालि नं आवश्यक जूगु धयादिल ।
अथेहे वयेकलं संघीय प्रणाली दुने भारतीय मोडलया न्यायप्रणली उपयुक्त जुइगु धयादिल । वयेकलं संघीय व्यवस्थाय् नं पूर्ण स्वतन्त्र स्वयां नं सर्वोच्च अदालतया मातहतय् प्रदेश व स्थानीय तहया अदालत दइगु व्यवस्था बांलाइगु धयादिल ।
वर्तमान प्रधानन्यायाधीश मिनबहादुर रायमाझीया पदावधी थ्वहे वइगु मंसिर २७ गते फुइत्यंगुलिं वंगु वाःलय् संवैधानिक परिषदं प्रधानन्यायाधीशय् शर्माया नां शिफारिस याःगु खः ।
