सरकारया निर्णय प्रति माओवादीया आपत्ति
एनेकपा (माओवादी) पाखें शान्ति प्रकृयाया उल्लंघन जुयाच्वंगु सरकारया धापू प्रति माओवादीं आपत्ति प्वंकूगु दु ।
बिहीवाः सुथय् माओवादी पदाधिकारीतय् बैठकं मन्त्रिपरिषदया निर्णय प्रति आपत्ति प्वंकूगु खः । माओवादीं पार्टी अध्यक्ष पुष्पकमल दाहाल 'प्रचण्ड' नाप प्रधानमन्त्री लगायत सरकारी अधिकारीतय्सं याःगु खँल्हाबंला विपरित सरकारं थ्व निर्णय याःगु निष्कर्ष नं पिकाःगु दु ।
बैठक लिपाः संचारकर्मीत नाप खँल्हाबंला यानादिसें माओवादी उपाध्यक्ष नारायणकाजी श्रेष्ठ 'प्रकाशं' मन्त्रिरिषदया निर्णय अस्वभाविक जूगुलिं उकीया कडा प्रतिवाद यायेगु धयादिल । वयेकलं सरकारया निर्णय बारे माओवादीं प्रधानमन्त्री नाप खँल्हाबंला याइगु कनादिल ।
थ्वस्वयां न्ह्यः बुधवाः च्वंगु मन्त्रिपरिषदया बैठकं माओवादीं शान्ति सम्झौता विपरित ज्या यानाच्वंगुलिं उकीया बारे अन्तर्राष्ट्रिय समुदाया ध्यानाकर्षण यायेगु निर्णय याःगु खः ।
