पत्रकारत पाखें देय्न्यंक विरोध प्रदर्शन
रुकुमया क्रियाशिल पत्रकार टिका विष्टयात याःगु सांघातिक हमलाया विरोधय् नेपाल पत्रकार महासंघया अगुवाई बिहीवाः देय्न्यंक विरोध प्रदर्शन याःगु दु । देय्न्यंकया महासंघया शाखां जिल्ला प्रशासन ज्याकू न्ह्यने प्रदर्शन यायेगु नापं जिल्ला अधिकारीयात ज्ञापन पौ नं लःल्हाःगु दु ।
महासंघं पाल्पाय् याःगु विरोध यालीं तानसेनबजाः परित्रमा याःगु खःसा लिपाः जिल्ला प्रशासन ज्याकूया मू गेटय् धर्ना च्वंगु खः । धर्ना लिपा ग्वसाःग्वःगु कोण सभाय् पत्रकारतय्सं लोकतन्त्र व प्रेस स्वतन्त्रता निगू स्वाःगु विषय जूगु खँयात दलतय्सं थुइकेमाःगु खँय् बः ब्यूगु खः ।
अथेहे पत्रकारतय्सं नेपालगञ्ज, सर्लाही लगायत थीथी थासय् विरोध प्रदर्शन याःगु दु । अथेहे पत्रकारतय्सं सर्लाहीलय् दीम्ह गृहराज्यमन्त्री रिजवान अन्सारीयात नापलानाः पत्रकारतय् सुरक्षाया विषलय् गम्भीर जुइत इनाप याःगु खःसा लिसलय् राज्यमन्त्री अन्सारीं पत्रकारतय् सुरक्षाया विषयलय् सरकार संवेदनशिल जूगु धयादिसें रुकुम घटनाया दोषीयात याकनं हे कारवाही यायेगु आश्वासन बियादिल ।
वंगु मंलगवाः अज्ञात मनूतय्सं पत्रकार विष्टयात आक्रमण याःगु खः । स्वास्थ्य अवस्था गम्भीर जुम्ह विष्टयात आः येँया मोडेल अस्पतालय् वासः याकातःगु दु ।
