गतिरोध ज्यंकेत पहल यानाबीत प्रम पाखें कोइरालायात इनाप
प्रधानमन्त्री माधवकुमार नेपालं नेपाली कांग्रेसया सभापति गिरिजाप्रसाद कोइरालायात राजनीतिक गतिरोध ज्यंकेगु निंतिं पहल यानाबीत इनाप यानादीगु दु ।
बुधवाः सनिलय् कोइरालाया महाराजगञ्जय् च्वंगु छेँय् थ्यंकाः प्रधानमन्त्री नेपालं नेपाःया वरिष्ठ नेता व अभिभावकया रुपं वर्तमान राजनीतिक गतिरोध ज्यंकेगु निंतिं पहल यानाबीत इनाप यानादीगु खः । वयेकपिं दथुइ उच्चस्तरिय राजनीतिक संयन्त्र गठन यायेगु बारे नं सहलह जूगु खः ।
अथेहे उगु ईलय् प्रधानमन्त्री नेपालं कालापत्थरय् च्वंगु मन्त्रिपरिषदया बैठक नापं कोपनहेगन सम्मेलनय् नेपाःया तयारी बारे कांग्रेस सभापति कोइरालायात जानकारी बियादीगु खः ।
निम्ह नेतातय् खँल्हाबंलाया ईलय् नापं दीम्ह कांग्रेस नेता कृष्ण सिटौलां सहमति व सहकार्य पाखें हे समस्याया समाधान जुइगु खँय् निम्ह नेतात दथुइ सहमति जूगु खँ पत्रकारतय्त कनादिल । वयेकलं प्रधानमन्त्री नेपालं कोइरालायात गतिरोध ज्यंकेगु निंतिं पहल यानाबीत इनाप याःगु नं कनादिल ।
वंगु शुक्रवाः कैलालीया डुडेझारीलय् जूगु घटना लिपाः प्रधानमन्त्री राजनीतिक गतिरोध ज्यंकेगु निंतिं पहल यानादीगु खः । थ्वस्वां न्ह्यः प्रम नेपालं माओवादी अध्यक्ष पुष्पकमल दाहाल 'प्रचण्ड'यात नं नापलायेधुंकूगु दु ।
