'१८ दलं नं क्षमा फ्वनेमाः'
येँ (सन्ध्या टाइम्स)/देशय् ब्वलनाच्वंगु राजनीतिक अन्यौल चीकेगु लागिं तःधंगु स्वंगू दलं गठन याःगु कार्यदल दुने प्रधानसेनापति प्रकरणय् राष्ट्रपति डा. रामवरण यादवयात सरकारया पलाः उल्टे यायेगु लागिं वय्कःया निवासय् वनाः सुझाव बिउ वंपिं १८ दलं नं क्षमा फ्वनेमाःगु प्रस्ताव वःगु दु। थौं सुथय् च्वंगु उगु कार्यदलया बैठकय् माओवादीया दुजःतय्सं थ्व प्रस्ताव तःगु खः ।
बैठकय् प्रधानसेनापति प्रकरणय् राष्ट्रपतिपाखें ल्ह्वंगु पलाः गलत खः धइगु स्वीकार याःसां उकी राष्ट्रपतियात धाःसा छुं हे आक्षेप मवइ कथंया भाषा तयाः संकल्प प्रस्ताव तयार यायेगुपाखे कुतः जूगु खँ सूत्रं धाःगु दु। थ्व प्रकरणय् माओवादीया इच्छा नं पूवनीगु व राष्ट्रपतियात नं आँच मवइ कथं दथुया लँ मालेगु लागिं कार्यदलया दुजःतय्सं कुतः यानाच्वंगु खँ नं धाःगु दु ।
बैठक सुथय् च्वंगु खःसां उकिं आः तक छुं हे निष्कर्ष धाःसा पिकाये मफुनि। न्हिनय् जा नयेत धकाः बैठक दिकूगु दु। स्थगित बैठक न्हिनय् १ बजे हानं च्वनेत्यंगु दु ।
