असहमत बुँदाय् मतदान याइगु जुल
येँ (सन्ध्या टाइम्स)/आवंलि राजनीतिक दलय् जाति, भाषा नापं थीथी पक्षयात समानुपातिक रुपं दुथ्याकेमाः कि म्वाः धइगु विषययात कयाः सहमति जुइ मफुगु कारणं थ्वहे वइगु ३० गते संविधानसभाया संवैधानिक समितिइ मतदान याइगु जूगु दु। थौं च्वंगु समितिया मुँज्यां असहमति जुयाच्वंगु फुक्क विषयय् ३० गते मतदान याना क्वःछीगु निर्णय याःगु खः। सहमति मजुयाः मतदान हे यायेमालीगु विषयया छगू धलः हे समितिं दयेकूगु खः ।
मतदान यायेमालीगु विषय धकाः समितिं दयेकूगु धलखय् राष्ट्रिय ध्वाँय्, राष्ट्रिय चिं, जाति-भाषा-धर्मया लिधंसाय् राजनीतिक दल चायेके बीगु वा मबीगु, संविधान संशोधन गय् यानाः यायेगु, संविधानय् अपरिवर्तनीय धारा तयेगु व मतयेगु धइगु विषयत दुथ्यानाच्वंगु दु। माओवादीं संविधानया फुक्क हे धारा परिवर्तनशील जुइमाः धकाः प्रस्ताव तयातःगु दु ।
