नेवाः राष्ट्रिय म्येँय् नेवाः ध्वाँय्
येँ (सन्ध्या टाइम्स)/वइगु पुस ११ गते नेवाः स्वायत्त राज्य मंकाः संघर्ष समितिं नेवाः राज्य घोषणा याइबलय् तुं सार्वजनिक याइगु नेवाः राष्ट्रया म्येँय् नेवाः ध्वाँय्या खँ नं दुथ्याकूगु दु ।
'ह्याउँगु भूमिइ अष्टमंगल, उकी दुने थीगु नगु' धकाः म्येँय् न्ह्यथनातःगु दु। उगु नेवाः राष्ट्रिय म्येँ जनकवि दुर्गालाल श्रेष्ठं च्वयादीगु खः। तसकं सरल भासं जातीय स्वशासन माः अले जातीय स्वशासनं जक फुक्क जातिया स्वां ह्वइगु अले झीगु निंतिं झीपिं छप्पँ जुयाः न्ह्याः वनेमाः धइगु भाव ब्वलंगु उगु म्येँय भाजु तीर्थ मालीं संगीत तयादीगु दु ।
थौंकन्हय् नेवाः राष्ट्रिय म्येँ हालेगु निंतिं कलाकारतय्सं अभ्यास यानाच्वंगु दु। म्येँय् धिमे व बाँसुरीयात मू बाजंया रुपय् छ्यलातःगु दुसा सहायक बाजं कथं खिं, गितार, सारंगी नापं मेगु बाजंत छ्यलातःगु दु ।
नेवाःतय्गु उगु राष्ट्रिय म्येँ पुस ११ गते नेवाः राज्य घोषणा जुइगु इलय् सकल नेवाःतय्सं मंकाः कथं हाले फयेकेगु नितिं याकनं हे रेकर्ड यानाः त्वाःत्वालय् व थीथी थासय् छ्वयाः अभ्यास याके बीगु तयारी जुयाच्वंगु खँ नं धाःगु दु ।
जातीय स्वायत्तताया माग याना वयाच्वंपिं नेपाःया थीथी आदिवासी जनजातित मध्ये नेवाःतय्सं थःपिनिगु जातीय स्वायत्त राज्यया निंतिं ब्यागलं कथं राष्ट्रिय म्येँ दयेकूगु सम्भवतः थ्व हे न्हापांखुसी खः ।
