नेवाः जातीय पुचः दथुइ अन्तर्क्रिया
शाक्यतय् समर्थन
येँ (सन्ध्या टाइम्स)/वइगु पुस ११ गते नेवाः स्वायत्त राज्य मंकाः संघर्ष समितिपाखें यायेत्यंगु नेवाः स्वायत्त राज्यया घोषणा ज्याझ्वःयात तिबः बीगु ताः तयाः दी शाक्य फाउण्डेशनपाखें थन छगू अन्तर्क्रिया यात ।
ज्याझ्वलय् न्ववासें दी शाक्य फाउण्डेशनया संस्थापक दुजः व नेपाः राष्ट्रिय पार्टीया न्वकु नरेशवीर शाक्यं चुनावया इलय् नेवाः नेवाः धकाः भोट कयाः त्याका वंपिं मनूत नं चुनाव लिपा थःगु पार्टी लिनाः वंगुलिं आः नेवाःतय्सं थःगु लागिं थम्हं हे संघर्ष यायेमाःगु दु धयादिल ।
लोकतान्त्रिक नेवाः संघया नायः सानुराजा शाक्यं यदि नेवाःतय्सं आः नं थःगु अधिकार काये मफुत धाःसा सदांया लागिं द्याकाच्वने माली धयादिल ।
शाक्य फाउण्डेशनया नायः देवकाजी शाक्यं नेवाः स्वायत्त राज्य मंकाः संघर्ष समितिं याःगु आह्वानयात थःगु संगठनं पूर्ण रुपं समर्थन यानागु दु धयादिल ।
ज्यापु महागुथिया नायः विपिन्द्र महर्जनं नं न्ववानादीगु उगु ज्याझ्वलय् थीथी सहभागीतय्सं नेवाः स्वायत्त राज्यया बारे न्ह्यसः तयादीगु खःसा वक्तातय्सं उकियात ध्वाथुइकेगु ज्या यानादीगु खः ।
तण्डुकारतय् सहलह
येँ (सन्ध्या टाइम्स)/नेवाःतय्सं बिस्कं स्वायत्त राज्य घोषणाया तयारी यानाच्वंगु सन्दर्भय् नेपाल तण्डुकार समाजं यलया गुसिंगालय् देय्या समसामयिक राजनीति व नेवाः सरोकार विषयय् छगू अन्तर्क्रिया ज्याझ्वः यात ।
ज्याझ्वलय् मू पाहां कथं झाःम्ह नेपाः राष्ट्रिय पार्टीया अध्यक्ष डा. केशवमान शाक्यं नेवाः स्वायत्त राज्यया प्रत्याभूति वर्तमान सन्दर्भय् नेवाःतय्सं गुलि तक राजनीति म्हितेफु धइगु खँय् निर्भर जुइ धयादिल। नेवाःतय्सं थ्व इलय् अग्राधिकार कायेगु धइगु राजनीतिक अग्राधिकार हे खः धइगु स्पष्ट यासें वय्कलं थ्व इलय् जातीय संघ संस्थां याइगु आन्दोलन हे जक सशक्त जुइगु बिचाः नं प्वंकादिल। वय्कलं नेपाः राष्ट्रिय पार्टीया अवधारणा कथं उत्तर-दक्षिण स्वाःगु न्यागू प्रान्त दयेकेगु व उकिया दुने जातीय प्रदेशत निर्माण यायेमाःगु खँ नं कनादिल ।
समाजया नायः मदन तण्डुकारया सभापतित्वय् जूगु ज्याझ्वलय् दुजः हेरालाल तण्डुकारं नं नुगःखँ प्वंकादीगु खः। ज्याझ्वलय् मूछ्यांज्ये नरेन्द्र तण्डुकार व पुलांम्ह नायः विष्णुभक्त तण्डुकारं नं न्ववानादीगु खः ।
