बन्द लित कयाः प्रदर्शन
येँ (सन्ध्या टाइम्स)/ एकीकृत नेकपा (माओवादी)या किसान, सुकुम्बासी, मुक्त कमैया व हलिया समुदायपाखें देय्न्यंकं प्रदर्शन यायेगु ग्वसाः ग्वःगु दु ।
मजदूर संगठनं आह्वान याःगु थौंया ज्याझ्वलय् देय्न्यंकं यातायात व कारखाना बन्द ज्याझ्वः लित कयाः थौं हे रत्नपार्क लागाय् विरोध प्रदर्शन याइगु जूगु दु। मजदूरतय्गु थीथी माग नापं माओवादीं ल्ह्वना वयाच्वंगु राजनीतिक मुद्दाया समर्थनय् मजदूरतय्सं थ्व प्रदर्शन यानाच्वंगु खः।
मजदूरतय्सं बन्द आह्वान यानातःगु जूसां माओवादी स्थायी समितिं देय्या राजनीतिक अवस्था, मानव अधिकारवादीतय्गु सम्मेलन, इहिपाया मौसम आदि खँयात ध्यानय् तयाः यातायात बन्द ज्याझ्वः लित कायेगु निर्णय याःगु खः। तर मजदूरतय्गु ज्याझ्वलय् पार्टीं हस्तक्षेप यात धकाः मजदूरतय्सं थौं जुइमाःगु मेमेगु ज्याझ्वःत नं लित कयागु घोषणा याना बिउगु खः। माओवादी दुने विद्यार्थी व मजदूरयात बिस्कं महत्व बियातःगु दु ।
होटल मजदूरतय्सं थीथी होटलया पिने यखानातःगु हाकुगु ब्यानरय् वर्तमान सरकारया प्रधानमन्त्री व मन्त्रीतय्त तकं होटलय् दुकायेगु मखु धकाः च्वयातःगु दु ।
