शंखधर व गणेशमानया लुमंतिइ किपा च्वज्या
येँ (सन्ध्या टाइम्स)/राष्ट्रिय विभूति शंखधर शाख्वाःया लुमन्ति व लौहपुरुष गणेशमान सिंहया ९४ क्वःगु बुन्हिया लसताय् थनया इतुम्बाहालय् किपा च्वज्या धेंधेंबल्लाः कासा जुल। नेपाल बाल संगठन येँ जिल्लाया ग्वसालय् जूगु उगु ज्याझ्वलय् १०५ गू स्कुलया २१० म्ह विद्यार्थीतय्सं ब्वति काःगु खः ।
कासाय् जिनियस स्कुलया दिनेश प्रधानं न्हाप सिरपा त्याकूगु खः। अथे हे गीतामाता स्कुलया किरण श्रेष्ठ लिउ लाःगु खःसा विजयेश्वरी सेकेण्डरी स्कुलया कुमार सिंह राई लियां लिउ लाःगु खः। कासाय् न्हाप, लिउ व लियां लिउ लाःपिंत छसिकथं झिद्वः, न्याद्वः व स्वद्वः तका दां नापं शंखधर साख्वाःया मूर्ति, पदक व दसिपौ लःल्हाःगु खः। कासाया निर्णायक मण्डलय् नांजाःम्ह कलाकार किरण मानन्धर च्वनादीगु खः ।
बाल संगठन येँ जिल्लाया नायः भगवान शाक्यया सभापतित्वय् जूगु उगु ज्याझ्वलय् नेपाली कांग्रसया उपसभापति प्रकाशमान सिंहं कासा त्याकूपिं विद्यार्थीतय्त सिरपाः लःल्हानादीगु खः।
ज्याझ्वलय् न्ववासें मूपाहां सिंहं गणेशमान सिंह हे जन्म जूगु लागाय् थौं वय्कःया हे लुमंतिइ जुयाच्वंगु ज्याझ्वलय् मूपाहां जुइ दयाः थःत लय्ताः वयाच्वंगु खँ कनादिल ।
