नेप्से म्हिगः नं ६ अंकं थहां वन
येँ (सन्ध्या टाइम्स)/नेपाल स्टक एक्सचेन्जय् जुयाच्वंगु शेयर कारोबारं थ्व वाःया लगातार स्वन्हुया न्हि कुन्हु नं नेप्से परिसुचक थहां वंगु दु। स्ववाः लिपा थुगु वाःया न्हापांगु न्हि निसें नेप्से सुधार जुयाः थहां वनाच्वंगु दु। नेप्से लगातार कुहां वयेवं लगानीकर्तात शेयर बजाःपाखें पिहां वनाच्वंगु खः। शेयर विश्लेषकतय्सं विश्व बजारय् लुँया भाः कुहां वयेवं थुकिया सकारात्मक लिच्वः शेयरय् लाःगु विश्लेषण याःगु दु ।
तर थ्व वालय् नेप्से लगातार थहां वनाच्वंसां शेयर व दांया कारोबार धाःसा थहां वनाच्वंगु मदु। एक्सचेन्जया कथं बजाः चालवं हे नेप्से नं लगातार थहां वनेगु शुरु जूगु खः। तर नं कारोबार शुरु जुइवं पलखया निंतिं नेप्से परिसुचक स्थिर जूगु खःसा करीब बाघौ लिपा सुचक थहां वंगु खः ।
थ्व ल्याखं नेप्से थहां वनेगु क्रमं कारोबारया अन्त तकं कायम जुइवं म्हिगः नेप्से ६ दशमलव १७ अंकं थहां वनाः ५३० दशमलव ३५ अंकय् थ्यन। सेन्सेटिभ इन्डेक्स नं १ दशमलव ८५ अंकं थहां वंगु दुसा फ्लोट शुन्य दशमलव ७५ अंकं थहां वन ।
नेप्सेय् दकलय् अप्वः प्रभाव लाकीगु वाणिज्य समुह कारोबार जूगु उपसुचकय् दकलय् अप्वः १० दशमलव शुन्य ३ अंकं थहां वनाः ४९९ दशमलव ८८ अंकय् थ्यंगु दु। उखे विकास बैंक नं सुधार जुइगु झ्वलय् ९ दशमलव ७७ अंकं थहां वनाः ५८७ दशमलव ७ अंकय् थ्यंगु दु। फाइनान्स समुह नं १ दशमलव ३८ अंकं थहां वनाः ५५७ दशमलव ४४ अंकय् थ्यन ।
उखे कारोबार जूगु उपसुचकय् अन्य समुह धाःसा २ दशमलव ३५ अंकं कुहां वनाः ५८६ दशमलव २९ अंकय् थ्यन।
स्टक एक्सचेन्जय् म्हिगः पीगुंगू कम्पनीया ७९१ क्वः तक शेयर कारोबारय् प्यंगू करोड झिंच्यागू लाख ७० द्वः तका बराबारया ख्वीप्यद्वः व गुसः व नीप्यंगू कित्ता शेयर न्याये-मी जुल। कारोबार कम्पनी मध्ये म्हिगः स्वीच्यागू कम्पनीया शेयर भाः थहां वंगु दुसा खुगू कम्पनीया जक शेयर भाः कुहां वंगु दु। अथे हे न्यागू कम्पनीया शेयर भाः यथावत हे जुल। छन्हु न्ह्यः जूगु कारोबारया तुलनाय् म्हिगःदां, कारोबार कम्पनी व शेयर कारोबार धाःसा कुहां वःगु दु ।
दकलय् अप्वः १०,८०० कित्ता शेयर कारोबार याःगु बैंक अफ काठमाण्डुया प्रमोटर शेयरं दांया ल्याखं नं दकलय् अप्क ग्वीप्यंगू लाख न्यय्द्वः तका बराबरया कारोबार याःगु दु। अपी फाइनान्स लिमिटेडं दकलय् अप्वः कमे याःगु दुसा क्रिष्ठल फाइनान्स लिमिटेडं दकलय् अप्वः गुमे याःगु दु ।
