शान्ति प्रकृयाया पुनरालोकन आवश्यक : प्रधानमन्त्री
प्रधानमन्त्री माधवकुमार नेपालं राजनीतिक दलत दथुइ जूगु झिंनिगू बुँदे समझदारी निसें आः तकया दक्वं शान्ति प्रकृयाया पुनरावलोकन आवश्यक जूगु खँ धयादीगु दु । वयेकलं नकतिनिया छुं घटना पाखें शान्ति प्रकृया स्यनीगु खःला धकाः आशंका ब्वलंगु खःसां सरकार शान्ति प्रकृयाया प्रति प्रतिबद्ध जूगु धयादिल ।
बुधवाः मिसतय्त जुइगु हिंसा विरुद्धया डेक्स अवलोकन लिपाः पत्रकारत नाप खँल्हाबंला यानादिसें प्रम नेपालं शान्ति प्रकृयाया व्याख्या व उकीया सूचनात एकीकृत यायेगु निंतिं परराष्ट्र, गृह व संचार मन्त्री दुथ्याइगु छगू डेक्सया व्यवस्था यायेगु खँ धयादिल । वयेकलं अज्याःगु डेक्सं आः तकया शान्ति प्रकृयाया जानकारी व उकीया समिक्षा याइगु कनादिल ।
अथेहे वयेकलं कैलालीया डुडेझारी घटनाय् घाःपाः जूपिंत वासः याकेत प्रमुख जिल्ला अधिकारीयात निर्देशन बीधुंकूगु व सिपिनि छेँजःयात क्षतिपूर्ति बीगु निंतिं पहल जुयाच्वंगु धयादिल । वयेकलं थ्व घटनाया बारे छानविन यायेत सरकारं आयोग गठन यायेधुंकूगु नं कनादिल ।
