विष्टयात नापलायेत संचार मन्त्री अस्पतालय्

निन्हु न्ह्यः अज्ञात मनूतय् आक्रमणय् लाना: अचेत अवस्थाय् दुम्ह रुकुमया पत्रकार टीका विष्टया स्वास्थ्य स्थिति थुइकेत सुचना व संचार मन्त्री नापं सरकारया प्रवक्ता शंकर पोखरेल बुधवाः येँया मोडेल अस्पताल झायादीगु खः । अन वयेकलं स्वास्थ्य अवस्था गम्भीर जुम्ह पत्रकार विष्टया स्वास्थ्य स्थिति बारे जानकारी कयादीगु खः ।

विष्टयात थप वासः याकेत थौं तिनि वयेकयात हेलिकप्टरय् तयाः रुकुम पाखें येँ हःगु खः । राजधानी दैनिकया स्थानिय सम्वाददाता व अनया स्थानीय सिस्ने एफएमय् कार्यरत विष्टयात अज्ञात पुचलं याःगु आक्रमणा विरुद्ध थीथी पत्रकार संगठनतय्सं विरोध स्वरुप बुधवाः देयन्यं विरोध प्रदर्शन याःगु दु ।