माओवादीं शान्ति सम्झौता उल्लंघन यात : सरकार
कैलाली घटनाया छानविन यायेत आयोग गठन
मन्त्रिपरिषदया बैठकं एनेकपा (माओवादीं) शान्ति सम्झौता उल्लंघन याःगु निष्कर्ष पिकासें उकीया बारे अनमिन लगायत अन्तर्राष्ट्रिय जगतया ध्यानाकर्षण याकेगु निर्णय याःगु दु । माओवादीं कैलालीया घटना नापं सिंहदरवार घेराउ, बन्द लगायत ज्या यानाः शान्ति सम्झौताया उल्लंघन याःगु ठहर मन्त्रिपरिषदं याःगु दु ।
अथेहे बुधवाः सुथय् च्वंगु मन्त्रिपरिषदया बैठकं कैलाली घटनाया छानविन यायेत सुकुम्बासी आयोग गठन याःगु दु । बैठकं नेकपा (माले)या पोलिटब्यूरो दुजः गोपालमणि गौतमया अध्यक्षताय् झिंस्वम्ह दुजः दुगु आयोग गठन याःगु खः । बैठकं आयोगया प्रतिवेदन लिपाः जक कैलाली घटनाया पीडितयात राहत उपलब्ध यायेगु निर्णय नं याःगु दु ।
बैठकं पुलाम्हं जुजु ज्ञानेन्द्रयात करया दायारय् हयाः थ्वस्वयां न्ह्यः जूगु निर्णय कार्यान्वयन यायेगु निर्णय नं याःगु दु । नापं मधेश आन्दोलनया झ्वलय् सिपिं व घाःपाः जूपिंत क्षतिपूर्ति बीत निगू करोडया बजेट निकासा यायेगु, दलित नाप ईहिपा याइपिंत सिरपा बीत फ्यानातःगु बजेट निकासा यायेगु लगायत निर्णय याःगु दु ।
नेपाली सेनाया सहायक रथी महेशविक्रम कार्कीया पदावधि थप याःगु दुसाः प्रधानसेनापति छत्रमान गुरुङयात भारतया मानार्थ सेनापतिया उपाधि कायेगु स्वीकृति नं सरकारं ब्यूगु दु । अथेहे प्रधानसेनापति गुरुङया अनुपस्थिति रथि तोरणबहादुर सिंहयात कामु प्रधानसेनापतिया जिम्मेवारी बीगु निर्णय याःगु दु ।
