कांग्रेसया नेतृत्व आः जिं याये : देउवा
नेपाली कांग्रेसया वरिष्ठ नेता शेरबहादुर देउवां पार्टीया नेतृत्व आः थःम्हं यायेगु खँ धयादीगु दु ।
मंगलवाः झापाय् पार्टी कार्यकर्तायात सम्बोधन यानादिसें वयेकलं थःम्हं जक कांग्रेसयात एकीकृत यायेफुगु दाबी यानादिसें आः पार्टी नेतृत्व वयेकलं हे यायेगु धयादिल । वयेकलं कांग्रेस सभापति गिरिजाबाबु उमेर व स्वास्थ्य निगूलिं दृष्टिं अशक्त जूगु धयादिसें आः पार्टीया नेतृत्व वयेकलं यायेगु धयादिल ।
वयेकलं पार्टी विभाजन लिपाः कार्यकर्तातय् निराशा ब्वलंगु धयादिसें आः पार्टी एकता जुइधुंकाः नं कार्यकर्तात दथुइ भावनात्मक एकता जुइ मफुगु कनादिल । वयेकलं कार्यकर्तातय् मनोबल बृद्धि यायेत नं सक्षम नेतृत्व आवश्यक जूगु धयादिसें उकीया निंतिं थः तयार जूगु धयादिल ।
माओवादी अराजकतां देय् जटिलता उन्मुअ जूगु देउवां द्वपं बियादि । वयेकलं उकीया विरुद्ध संगठित जुइत कार्यकर्तातय्त इनाप यानादिल । अथेहे, वयेकलं माओवादीया अराजकता मदितल्ले लोकतन्त्रया भविष्य मदुगु धयादिसें माओवादी लडाकूया व्यवस्थापन यानाः जक संविधान निर्माण यायेमाःगु बिचाः प्वंकादिल ।
