कांग्रेस दुने राष्ट्रपतिपाखें लबिङ !
येँ (सन्ध्या टाइम्स)/राष्ट्रपति डा.रामवरण यादवं नेपाली कांग्रेसया महामन्त्री केबी गुरुङया पक्षय् दुपिं कांग्रेसया नेतातय्त थःगु निवासय् सःताः आः एकीकृत नेकपा (माओवादी),नेपाली कांग्रेस व नेकपा (एमाले) या शीर्ष नेतातय्त वर्तमान संविधानं पिहां वनाः सहमति मयाकेगु निंतिं पार्टी दुने माःगु भूमिका म्हितेत इनाप यानादीगु दु।
दलतय् दथुइ न्ह्यागु हे सहमति जूसां संविधान दुने च्वनाः जक ज्या याके बीमाःगु खँ ल्हायेत पार्टी दुने नं गुगु नं हालतय् राष्ट्रपतियात थी मजिउ धाइपिं कांग्रेस नेतातय्त थःगु निवासय् सःताः राष्ट्रपति यादवं थ्व आग्रह यानादीगु खँ सूत्रं धाःगु दु। म्हिगः वय्कःया निवासय् महामन्त्री गुरुङ नापं नेतात गोविन्दराज जोशी, लक्ष्मण घिमिरे, विनयध्वज चन्दपिं वंगु खँ कांग्रेसया छम्ह नेतां 'सन्ध्या टाइम्स' यात कनादिल ।
कांग्रेस सभापति गिरिजाप्रसाद कोइराला वासः याकेत सिंगापुर वनाच्वंगु इलय् एकीकृत माओवादीया अध्यक्ष प्रचण्डलिसे माल धाःसा राष्ट्रपति व प्रधानमन्त्री नं हिलेत सहमति यात धकाः खँ पिहांवःगु कारणं राष्ट्रपति यादवं आवंलि अथे खँ मवयेकेगु निंतिं पार्टी दुने हे माःकथं लबिङ याकेत उकथं कांग्रेसया नेतातय्त सःताः सहलह ब्याकादीगु खँ धाःगु दु ।
नेपाली कांग्रेस दुने थौंकन्हय् सभापति कोइराला छम्ह त्वःताः स्वंगू गुट दु। थ्व स्वंगू गुटया नेतृत्व यानाच्वंपिं स्वम्ह नेतात शेरबहादुर देउवा, सुशिल कोइराला व केबी गुरुङ खः धाइ ।
