जनकपुरय् जोगीतय् धर्ना
येँ (सन्ध्या टाइम्स)/धर्ना घेराउ थेंज्याःगु ज्याझ्वः आः केवल राजनीतिक पार्टी, विद्यार्थी, मजदूर आदिया जक पेशा मखुत। थुकी आः भिक्षा प्वनाः दिनचर्या न्ह्याकीपिं जोगीत नं सामेल जू वःगु दु ।
जनकपुरया जोगीतय्सं थौं थथे हे अजू चायापुक अनया फुक्कं देगलय् धर्ना बियाः प्रहरीया विरोध यात। प्रहरीं निम्ह स्थानीय जोगीतय्त ज्वंगु विरोध यासें अनया सारा जोगीत मुनाः थ्व धर्ना बिउगु खः ।
जोगीतय् धर्नां यानाः थौं सुथय् ९ निसें १२ बजे तक अनया नांजाःगु जानकी मन्दिर व मेमेगु देगलय् नं नियमित पुजा पाठ व दर्शनया ज्या तकं जुइ मफुत। जोगीतय्सं जानकी मन्दिरया मू लुखाय् हे च्वनाः धर्ना बिउगु खः ।
अनया छम्ह स्थानीय मनुखं अन हे च्वनीपिं जोगीतय्सं मन्त्र यानाः थःत बेहोश याना बिल धकाः प्रहरीइ उजुरी तयेवं उकिया हे लिधंसाय् प्रहरीं रामकृपाल व श्री शंकर नांया निम्ह जोगीतय्त म्हिगः ज्वना यंकूगु खः। ज्वंपिं जोगीतय्त तुरुन्त त्वःतेत माग यासें जोगीतय्सं थ्व धर्ना बिउगु खः ।
