नेप्से सुधार जुइगु क्रम जारी
येँ (सन्ध्या टाइम्स)/झण्डै स्ववाः लिपा सुधार जूगु नेप्से थ्व क्रमं म्हिगः नं निरन्तरता काःगु दु। नेपाल स्टक एक्सचेन्जया कथं शेयर कारोबार शुरु जुइवं छत्थुं कुहां वंगु नेप्से परिसुचक झण्डै बाघौ स्वयां छुं ई लिपा ३ अंकं थहां वंगु खःसा वयां छुं ई लिपा हे हाकनं कुहां वःगु खः। तर नं नेप्से हाकनं थहां वनेगु क्रमं निरन्तरता कायेवं अन्त तकं थ्व क्रम जारी हे जुल। नेप्से कुहां वयेगु क्रमं निरन्तरता कायेवं वंगु स्वदँ न्ह्यःया स्थितिइ तक थ्यने धुंकूगु खः। नेप्से मदिक कुहां वयेवं थुकिया लगानीकर्ता तसकं निराश तकं जुइधुंकूगु खः। लगानीकर्ता शेयर बजारय् लगानी यायेगुपाखें तापाक च्वनेवं नेप्से परिसुचक थहां वंसां कारोबार धाःसा छन्हु न्ह्यःया तुलनाय् गाक्कं कुहां वःगु दु ।
कारोबार जूगु उपसुचकय् वाणिज्य, विकास बैंक व व्यापारिक समुहया सुचक थहां वनेवं नेप्सेय् नं सकारात्मक लिच्वः लाःगु खः। स्टक एक्सचेन्जया कथं नेप्से ५ दशमलव शुन्य २ अंकं थहां वनाः ५२४ दशमलव १८ अंकय् थ्यंगु दुसा सेन्सेटिभ १ दशमलव १९ अंकं व फ्लोट शुन्य दशमलव ५२ अंकं थहां वंगु दु ।
शेयर बजाःया कारोबारं वाणिज्य समुह ७ दशमलव ५४ अंकं थहां वनाः ४८९ दशमलव ८५ अंकय् थ्यंगु दु। अथे हे व्यापारिक समुहया सुचक नं ४ दशमलव ८ अंकं थहां वनाः २६० दशमलव ८७ अंकय् थ्यंगु दु। छन्हु न्ह्यःया कारोबारय् कुहां वंगु विकास बैंक समुह म्हिगःया कारोबारय् दकलय् अप्वः ९ दशमलव १६ अंकं थहां वनेवं ५७७ दशमलव ९३ अंकय् थ्यन ।
मेखे स्टक एकसचेन्जय् जूगु शेयर कारोबारय् जलविद्युत समुह २ दशमलव शुन्य ५ अंकं कुहां वनाः ९५ दशमलव ८९ अंकय् थ्यंगु दु। फाइनान्स समुह शुन्य दशमलव २४ अंकं कुहां वनेवं ५५६ दशमलव शुन्य ६ अंकय् थ्यंगु दु। वीमा समुह हाकनं शुन्य दशमलव १९ अंकं कुहां वनाः ५७२ दशमलव ८९ अंकय् थ्यंगु दु ।
एक्सचेन्जया कथं म्हिगः ख्वीस्वंगू कम्पनीया ख्वीनिद्वः व स्वसः व चय्गुंगू कित्ता शेयर न्याये-मी जुयाः स्वंगू करोड पीनिगू लाख ग्वीखुद्वः तका दांया कारोबार जुल। छन्हु न्ह्यः स्टक एक्सचेन्जय् छगू लाख गुद्वः व सछि व न्हय्न्हय्गू कित्ता शेयर न्याये-मी जुयाः खुगू करोड झिंखुगू लाख व द्वःछि तका दां बराबरया कारोबार जूगु खः। कारोबार कम्पनी मध्ये स्वीछगू कम्पनीया शेयर भाः थहां वन। अथे हे नीनिगू कम्पनीया शेयर भाः कुहां वंगु दुसा झिगू कम्पनीया शेयर भाः यथावत कायम जुल ।
स्टायण्डर्ड चार्टर्ड, प्राइम, विशाल बजारया शेयर भाः थहां वंगु दुसा क्रिष्टल फाइनान्स, एभरेष्ट बैंकया शेयर भाः कुहां वंगु दु। बीओकें दकलय् अप्वः छगू करोड प्यंगू लाख ख्वीन्हय्द्वः तका दांया कारोबार याःगु दु। सनराइज बैंकं दकलय् अप्वः कमे याःगु दुसा क्रिष्टल फाइनान्स लिमिटेडं दकय् अप्वः द्यापं फःगु दु ।
