बुधवाः सवारी साधन चलेजुइगु

आन्दोलनरत एनेकपा (माओवादीं) बुधवाः आह्वान याःगु नेपाल बन्दय् सवारी साधन चलेजुइगु जूगु दु । संयुक्त राष्ट्रिय जनआन्दोलन समिति नेपालया संयोजक डा. बाबुराम भट्टराईं मंगलवाः छगू विज्ञप्ति पिथना यातायात बन्द स्थगित यायेत माओवादीया ट्रेड युनियन संगठनयात इनाप याःगु दु ।

वयेकलं बुधवाः ईहिपाःया साइत दुगुलिं जनता पाखें वःगु सुझाव व मानव अधिकार राष्ट्रिय महाभेला नं लाःगुलिं यातायात बन्द लितः कायेत इनाप यानादीगु खः । यातायात बन्द लितकायेगु खँ धाःसां विज्ञप्तिइ कलकारखाना बन्द यायेगु पूर्व घोषित ज्याझ्वः यथावत दुगु खँ नं न्ह्यथंनातःगु दु ।

माओवादीया मजदुर संगठनं बुधवाः नेपाल बन्दया आह्वान याःगु खः । माओवादीं स्वंगूगु चरणया आन्दोलन अर्न्तगत पार्टीया भातृ संगठनतय्सं थीथी संघर्षया ज्याझ्वः घोषणा याःगु खः ।