कार्यदलया बैठकय् सहमति यायेगु बारे सहलह
राजनीतिक सहमति मालेत गठित स्वंगू राजनीतिक दलया नेतात दुथ्याःगु कार्यदलया बैठकय् सहमतिया विकल्प बारे सहलह जूगु दु ।
मंगलवाः सिंहदरवारय् च्वंगु शान्ति व पुनर्निमाण मन्त्रालयलय् च्वंगु बैठकं न्हापाःया कार्यदलं न्ह्यब्वःगु मंकाः संकल्प प्रस्तावया विषयलय् गुकथं न्ह्याः वनीगु बारे प्रारम्भिक सहलह याःगु दु । अथेहे बैठकय् शुक्रवाः कैलालीलय् सुकुम्बासी व प्रहरी दथुइ जूगु ल्वापूया बारे नं सहलह जुगु दु ।
बैठकय् सत्तारुढ दल व विपक्षी दल दथुइ अप्वयाच्वंगु दुरीयात चीकेगु बारे नं सहलह जूगु खः । माओवादीपाखें कार्यदलय् दुजः जुयादीम्ह नारायणकाजी श्रेष्ठ 'प्रकाशं' शुरु निसें हे राजनीतिक गतिरोध चीकेगु बारे सहलह जूगु व कार्यदलं न्हूगु ढंगं सहमति यायेगु कुतः जूगु धयादिल ।
सोमवाः च्वंगु शीर्ष नेतातय् बैठकं स्वंगूलिं दलया निम्ह-निम्ह नेता दुगु कार्यदल गठन याःगु खः । उगु कार्यदलं दक्वसितं स्वीकार्य जुइगु सहमतिया बुँदा तयार यायेगु व राजनीतिक गतिरोध ज्यंकेगु सहमति नेतातय् दथुइ जूगु खः ।
कार्यदलया मेगू बैठक बुधवाः सुथय् गुताः ईलय् हानं च्वनीगु जूगु दु ।
