थनिंनिसें स्थानीय निकाय नं ठप्प
येँ (सन्ध्या टाइम्स)/स्थानीय निकायया कर्मचारीतय्सं स्थानीय विकास मन्त्रालयपाखें वयाच्वंपिं स्थानीय निकायया प्रमुख कर्मचारीतय्त लित छ्वयाः प्रमुखया ज्याकुथी तालं ग्वया बिउगुलिं थनिंनिसें स्थानीय निकाय नं ठप्प जूगु दु ।
एकीकृत माओवादी, नेपाली कांग्रेस, एमाले नापं थीथी राजनीतिक पार्टीलिसे आवद्ध न्यागू कर्मचारी संगठनया मंकाः मोर्चा 'स्थानीय निकाय संयुक्त आन्दोलन केन्द्रीय समन्वय समिति'या आह्वानय् देय्न्यंकंया स्थानीय निकाय कर्मचारीतय्सं अथे स्थानीय मन्त्रालयपाखें वयाच्वंपिं कर्मचारीतय्त लित छ्वया बीवं थनिंनिसें स्थानीय निकायय् प्रमुखतपाखें ज्या ठप्प जूगु खः ।
कर्मचारीतय्सं देय्न्यंकंया जिल्ला विकास समितिया स्थानीय विकास अधिकारी व योजना अधिकृत, महानगरपालिकाया कार्यकारी अधिकृत व सहायक कार्यकारी, उप महानगरपालिका, नगरपालिकाया अधिकृत नापं गाउँ विकास समितिया सचिवतय्त लित छ्वयाः ज्याकुथी तालं ग्वया बिउगु खः ।
थ्व तालाबन्दीं यानाः नक्सा पास यायेगु, नाता प्रमाणित यायेगु, प्रमुखतपाखें याइगु सिफारिस, निर्णय आदि थेंज्याःगु महत्वपूर्ण ज्या ठप्प जूगु खः। स्वंगूगु चरणया आन्दोलन कथं कर्मचारीतय्सं थ्व पलाः न्ह्याकूगु खःसा थनं लिपा नं थःपनि माग पूमवन धाःसा थ्वहे वइगु मंसिर ३० गतेनिसें फुक्क हे स्थानीय निकाय बन्द यायेगु घोषणा यानातःगु दु ।
