देय्न्यंकंया शिक्षण संस्था ठप्प
येँ (सन्ध्या टाइम्स)/ माओवादी समर्थित अखिल नेपाल शिक्षक संगठनपाखें देय्न्यंकंया प्राथमिक तहनिसें उच्च मावि तकया शिक्षण संस्था थौं बन्द याना बिउगु दु।
शिक्षा ऐन एवं नियमावली २०२८ हीकेमाःगु, कम्पनी ऐन खारेज यायेमाःगु, स्कूलय् कर्मचारीया दरबन्दी तयेमाःगु, प्रक्रिया पूरा यानाः अस्थायी शिक्षकतय्त स्थायी यायेमाःगु, नागरिक सर्वोच्चता कायम यायेमाःगु, राष्ट्रिय सरकार गठन यायेमाःगु लगायतया माग यासें स्वंगूगु चरणया आन्दोलन अन्तर्गत दकलय् लिपांगु ज्याझ्वः कथं थौं थ्व बन्दया आह्वान याःगु खः। आन्दोलन कथं थौं हे शिक्षकतय्सं येँया शान्तिबाटिका लागां जुलुस पिकयाः देय् चाःहिलाःलि अन हे थ्यंकाः छगू सभा यात ।
थःपिनि माग थौं तकया दुने पूमवन धाःसा प्यंगूगु चरणया आन्दोलन अझ सशक्त कथं यायेगु खँ उगु संगठनया केन्द्रीय दुजः नापं नेवाः स्यनामि विजयरत्न बज्राचार्यं कनादिल।
शिक्षकतय् थ्व बन्दं यानाः थौं देय्न्यंकंया लखौं मस्त ब्वनेगुपाखें बञ्चित जूगु दु ।
