नेवाः स्वायत्त राज्य घोषणाया सहलह ज्याझ्वः
येँ (सन्ध्या टाइम्स)/पुस ११ गतेया नेवाः स्वायत्त राज्य घोषणा यायेत नेवाः जागरण मञ्चं शनिवाः राजनीतिक दलया नेतातनाप अन्तर्क्रिया ज्याझ्वः न्ह्याकल। उगु ज्याझ्वलय् नेकपा (एमाले)पाखें राजेन्द्र श्रेष्ठ, एनेकपा (माओवादी) पाखें दिलिप महर्जन, नेवाः जागरण मञ्चया सल्लाहकार लक्ष्मण राजवंशी, नेपाली कांग्रेसपाखें भिमसेनदास प्रधानपिंसं आः जुइत्यंगु नेवाः स्वायत्त राज्यया घोषणा ज्याझ्वःयात समर्थन यासें बिचाः प्वंकादीगु खः।
ज्याझ्वलय् न्ववाःपिं वक्तातय्सं थःगु लागाय् थःपिंसं हे शासन याये दयेमाःगु माग अन यानादीगु खः ।
थ्वहे वइगु पुस १ गते एनेकपा (माओवादी) पाखें ताम्सालिङ व नेवाः स्वायत्त राज्य घोषणा यायेत्यंगु दुसा पुस ११ गते नेवाः स्वायत्त राज्य मंकाः संघर्ष समितिं नेवाः स्वायत्त राज्य घोषणा याइगु ज्याझ्वः दु। थ्वहे ज्याझ्वःयात प्रचार यायेगु ताः तयाः थुकथंया अन्तर्क्रिया ज्याझ्वःत जुयाच्वंगु खः।
पुस ११ गते जुइगु ज्याझ्वःयात फुक्कं राजनीतिक पार्टीतय्सं समर्थन बीगु आशा यानातःगु दु। वकुन्हु नेवाः लागाया सीमाय् वनाः नेवाः ध्वाँय् ब्वयेकेगु ग्वसाः नं दयेकातःगु दु ।
