'विमर्श' यात कारवाही लसकुस
येँ (सन्ध्या टाइम्स)/नेपाल प्रेस काउन्सिलं साप्ताहिक 'विमर्श'यात पत्रपत्रिका वर्गीकरणय् हे समावेश मयासे याःगु कारवाहीयात साप्ताहिक पाक्षिक संजालं लसकुस याःगु दु।
संजालया अध्यक्ष देवप्रसाद त्रिपाठीं थन छगू वक्तव्य जारी यासें उगु वाःपौया सम्पादक राजेन्द्र वैध (उपचारकं) थीथी मनूतय्त ख्यायेगु, धम्की बीगु व ब्ल्याक मेलिङ्ग यायेगु यानाच्वंगु बारे आपालं खँ पिहां वयाच्वंगुलिं उकियात कारवाही याये हे माः धइगु थःपिनि धापू दुगु खँ धाःगु दु।
नेपाल प्रेस काउन्सिलं थुगुसी याःगु पत्रपत्रिका वर्गीकरणय् उगु वाःपौयात समावेश तकं मयायेवं उकिया सम्पादक राजेन्द्र वैधं प्रेस काउन्सिलया ज्याकू न्ह्यःने हे आमरण अनसन च्वंगु खः। छवाः तकया हडताल लिपा वय्कःया माग न्यनेगु धासें वय्कःया हडताल त्वाःथलेगु ज्या जूगु खः। आः वय्कःयात नर्भिक अस्पतालय् वासः याकातःगु दु। उगु वाःपौया वर्गीकरणयात कयाः प्रेस काउन्सिलं याःगु निर्णययात कयाः संजालं थःगु ध्यानाकर्षण जूगु खँ धाःगु दु ।
