यलय् अन्तर्राष्ट्रिय अपांग दिवस
यल (सन्ध्या टाइम्स)/१८ क्वःगु अन्तर्राष्ट्रिय अपाङ्ग दिवसया लसताय् पाटन सामुदायिक पुनर्स्थापना संस्था व महिला विकास कार्यालय यलया मंकाः ग्वसालय् 'अपाङ्ग अधिकार व स्थानीय सरोकार' धइगु मू नारा बियाः छगू पदयात्रा व जनजागरण ज्याझ्वः यात। थनया ठेचोय् जूगु उगु ज्याझ्वलय् बाजं नापं तयाः देय् चाःहिलेगु ज्या जूगु खः। र्यालीं ठेचो नापं वादेय्, वज्रबाराही आदि लागा नं चाःहिउगु खःसा स्थानीय एमर्याल्ड सेकेण्डरी स्कूलय् थ्यंकाः छगू सभा यासें ज्याझ्वः क्वचायेकूगु खः ।
उगु इलय् अन यल सीबीआरया अपाङ्गता दुपिं मस्तय्गु किपा च्वज्या धेंधेंबल्लाः कासा नापं मेमेगु कथंया अपाङ्गताया समस्या दुपिं मस्तय्सं दयेकूगु नसात्वँसा, मैनमत लगायतया ज्वलंतय् ब्वज्या जूगु खः ।
सीबीआर संस्थाया उपाध्यक्ष एलिना श्रेष्ठया सभापतित्वय् जूगु उगु ज्याझ्वलय् जिल्ला शिक्षा अधिकारी केशवप्रसाद दहाल मूपाहां कथं झाःगु खः। ज्याझ्वलय् सीबीआरया संयोजक इन्दिरा जोशीं लसकुस यानादीगु खःसा निवर्तमान अध्यक्ष शाक्य सुरेन आदिपिंसं नं न्ववानादीगु खः ।
