नेप्से सामान्य सुधार
येँ (सन्ध्या टाइम्स)/लगातार कुहां वयाच्वंगु नेप्से परिसुचकय् सामान्य सुधार जूगु दु। नेपाल स्टक एक्सचेन्जया कथं नेप्से मदिक कुहां वनाः वंगु स्वदँ न्ह्यःया स्थितिइ तक थ्यने धुंकूगु खः। तर म्हिगःया कारोबारं नेप्से परिसुचक झण्डै स्ववाः लिपा वयाः सामान्य सुधार जुयाः थहां वंगु दु। खतुं म्हिगः नं नेप्से शेयर बजाः चालेवं हे कुहां वनेगु शुरु जूगु खः। तर शेयर कारोबार शुरु जूगु घौछि लिपा बुलुहुँ थहां वनेगु क्रमं निरन्तर काःगु खःसा लिपांगु इलय् हाकनं कुहां वंगु खः। तर नं शेयर बजाः बन्द जुइत्यंगु इलय् धाःसा हाकनं थहां वनेवं नेप्से सामान्य सुधार जूगु खः ।
बैंक अफ काठमाण्डुया प्रमोटर शेयरया भाः लिसें नेप्से नं थहां वंगु दु। स्टक एक्सचेन्जं बिउगु जानकारी कथं वाणिज्य, जलविद्युत व फाइनान्स समुहलय् वःगु सुधारया लिसें नेप्से १ दशमलव ७१ अंकं थहां वनाः ५१९ दशमलव १६ अंकय् थ्यंगु दु। उखे सेन्सेटिभ नं शुन्य दशमलव १७ अंकं व फ्लोट इन्डेक्स शुन्य दशमलव १९ अंकं थहां वंगु दु ।
अथे हे कारोबार जूगु उपसुचकय् वाणिज्य समुह २ दशमलव ७७ अंकं थहां वनाः ४८२ दशमलव ३१ अंकय् थ्यन। जलविद्युत समुह दकलय् अप्वः ६ दशमलव ३६ अंकं थहां वनेवं ७९७ दशमलव ९४ अंकय् थ्यंगु दु। फाइनान्स समुह नं १ दशमलव शुन्य ४ अंकं सामान्य सुधार जुयाः ५५६ दशमलव ३ अंकय् थ्यन ।
मेखे विकास बैंक समुह २ अंकं कुहां वनाः ५६८ दशमलव ७७ अंकय् व वीमा समुह शुन्य दशमलव २७ अंकं कुहां वनाः ५७३ दशमलव शुन्य ८ अंकय् थ्यंगु दुसा अन्य समुहया कारोबार यथावत कायम जुल ।
न्यय्खुगू कम्पनीया शेयर कारोबार जूगुली नीखुगू कम्पनीया शेयर भाः थहां वंगु दुसा नीछगू कम्पनीया शेयर भाः कुहां वंगु दु। गुंगू कम्पनीया शेयर भाः धाःसा यथावत हे जुल। म्हिगः मुक्कं च्यासः व न्हय्न्याक्वः तक शेयर कारोबार जूगु दुसा दकलय् अप्वः प्राइम कमर्सियल बैंकया १५६ क्वः तक शेयर कारोबार जुल। स्टक एक्सचेन्जया कथं छगू लाख गुद्वः व सछि व न्हय्न्हय्गू कित्ता शेयर न्याये-मी जुयाः खुगू करोड झिंखुगू लाख व द्वःछि तका दां बराबरया शेयर कारोबार जूगु दु ।
शेयर बजारय् अरुण भ्याली हाइड्रो पावर, स्टायण्डर्ड चार्टर्ड, बैंक अफ काठमाण्डुया शेयर भाः दकलय् अप्वः कुहां वःगु दुसा भिवोर विकास, एनआईसी बैंक, नविल बैंकया शेयर भाः थहां वंगु दु ।
कारोबार जूगु कम्पनी मध्ये बैंक अफ काठमाण्डुया प्रमोटर शेयरं दकलय् अप्वः छगू करोड नीन्यागू लाख न्यय्खुद्वः तका दांया कारोबार याःगु दु। भिवोर विकास बैंकं दकलअय् अप्वः कमे याःगु दुसा अरुण भ्याली हाइड्रो पावर डेभलपमेण्ट कं. दकलय् अप्वः द्यापं फःगु दु ।
