निन्हु दुने सहमति मालेगु सहमति / हानं मेगू कार्यदल
सोमवाः च्वंगु स्वंगू प्रमुख दलया बैठकं निन्हुया दुने सहमति मालेगु सहमति याःगु दु । उकीया निंतिं स्वंगु दलया निम्ह-निम्ह नेतात दुथ्याःगु छगू कार्यदल नं गठन याःगु दु ।
राजनीतिक गतिरोध अन्त्यया निंतिं देयेकूगु उगु कार्यदलय् माओवादी पाखें नारायणकाजी श्रेष्ठ 'प्रकाश' व देव गुरुङ, कांग्रेस पाखें अर्जुननरिसंह केसी व कृष्ण सिटौला व एमोल पाखें भरतमोहन अधिकारी व भीम रावल दु ।
कार्यदलं थ्वस्वयां न्ह्यःया कार्यदलं तयार याःगु मंकाः संकल्प प्रस्तावयात थप परिमार्जन याना: शीर्ष नेतातय् बैठकय् पेश यायेगु व कैलाली घटनाया सम्बन्धय् सहमति मालीगु खँ माओवादी उपाध्यक्ष प्रकाशं कनादिल ।
वंगु शुक्रवाः कैलालीया डुडेझारीलय् माओवादी भातृ संगठनया अगुवाइ जंगलय् च्वनाच्वंपिं सुकुम्बासीत व प्रहरी दथुइ जूगु ल्वापूइ खुम्हं मल्याक सर्वसाधारण सीवं राजनीतिक दलत दथुइ द्वन्द्व अप्वयेवं उकीयात क्वचायेकेत नेतातय् बैठक च्वंगु खः ।
उगु घटनाया विरोधय् माओवादीं आइतवाः नेपाल बन्द घोषणा यायेवं थप तनाव जूगु खः । उकीयात ध्यानय् तयाः प्रधानमन्त्री माधवकुमार नेपाल, गृहमन्त्री भीम रावल लगायतया पुचः आइतवाः हे माओवादी अध्यक्ष पुष्पकमल दाहाल 'प्रचण्ड'या निवास थ्यंकाः खँल्हाबंला यानादीगु खः ।
थौंया बैठकय् एमालेया पाखें प्रधानमन्त्री नेपाल, गृहमन्त्री रावल, माओवादी पाखें अध्यक्ष प्रचण्ड उपाध्यक्षत डा. बाबुराम भट्टराई व प्रकाश, कांग्रेसया पाखे कार्यवहाक सभापति सुशील कोइराला, संसदीय दलया नेता रामचन्द्र पौडेल, अर्जुननरिसंह केसी, महेश आचार्यया उपस्थिति दुगु खः । अथेहे बैठकय् सहजकर्ताया रुपय् मानव अधिकारीवादीत पद्मरत्न तुलाधर व दमननाग ढुंगानाया नं उपस्थिति दुगु खः ।
