सित धाःपिं अझ जिवित हे
कैलालया डुडेझारी जंगलय् सुकुम्बासी व प्रहरी दथुइ शुक्रवा: जूगु ल्वापूइ सित धा:म्ह नरेन्द्र बिक जिवित हे दुगु खँ माओवादी सेनां धाःगु दु ।
गृहमन्त्री भीम रावलं आइतवाः येँ पत्रकार सम्मेलन यानाः सित धाःम्ह बिकयात माओवादी सेनां सोमवाः पत्रकार सम्मेलन यानाः सार्वजनिक याःगु दु । गृहमन्त्री रावलं बिकया आईडी नम्बर ३६८२ जुगु खँ धाःगु खः ।
सोमावाः माओवादीं याःगु पत्रकार सम्मेलनय् जनमुक्ति सेना खुगूगु डिभिजन सैन्य दर्ता नम्बर ३६८२या सुर्खेत साटाखानी-५ छेँ जुया जीत स्मृति बिग्रेडय् कार्यरत रुद्र चपाई जूगु धासें वयात नं सार्वजनिक याःगु दु । बिकया आईडी नम्बर धाःसाः ३७९५ जूगु खँ उगु ईलय् जानकारी ब्यूगु खः । बिक व चपाईं निम्हेसितं पत्रकार सम्मेलनय् सार्वजनिक याःगु खः ।
पत्रकार सम्मेलनय् डिभिजन कमाण्डर महेन्द्रबहादुर शाहीं माओवादी सेनाया दुजःत जीवित हे जुसां नं सरकारं नक्कली परिचयपत्र क्यनाः माओवादी सेनां वन अतिक्रमण याःगु धकाः क्यनाः द्वन्द्व अप्वयेकेत स्वःगु द्वपं बियादिल ।
वयेकलं पत्रकार सम्मेलनय् गृहमन्त्रीं थःगु अपराध ढाकछोप यायेत माओवादीया सेनाया संलग्नात क्यनेत स्वःगु धयादिल । वयेकलं माओवादी सेनायात थंज्याःगु घटनां उत्तेजित यानाः शान्ति प्रकृया स्यंकेत स्वसां माओवादी सेना देय् व जनता निंतिं संयम जूगु कनदिल ।
