संवैधानिक परिषदया बैठक थौं नं स्थगित

सोमवाः च्वनीगु धाःगु संवैधानिक परिषदया बैठकय् प्रमुख विपक्षी दलया नेता पुष्पकमल दाहाल 'प्रचण्ड' अनुपस्थित जुइवं थौं नं परिषदया बैठक च्वनेमफुत । वंगु मंगलवाः च्वंगु लिप्पांगु बैठकय् नं माओवादी अध्यक्ष प्रचण्ड उपस्थित मजुइवं बैठक स्थगित याःगु खः ।

परिषदं थीथी संवैधानि निकायलय् खाली जूगु प्रमखु पदया नियुक्तिया बारे सहलह यायेगु ग्वसाः ग्वःयातःगु खः । थ्वस्वयां न्ह्यः च्वंगु बैठकय् सर्वोच्च अदालतया प्रधानन्याधिशय् अनुपराज शर्माया नां सिफारिश याःगु खः । उगु बैठकय् नं प्रचण्ड अनुपस्थित जूगु खःसां लिपाः वयेकलं निणर्य पुस्तिकय् धाःसाः हस्ताक्षर यानादीगु खः ।

ताः ई तक बैठक च्वने मफयाः निर्वाचन आयोग, अख्तियार दुरुपयोग अनुसन्धान आयोग व महालेखा परिषदया प्रमुख पद खाली जुयाच्वंगु दु ।