लोडशेडिङं बजाःभाः थहां वन
देशय् लागू जूगु ताःहाकःगु लोडशेडिङं यानाः औद्योगिक ख्यःयात नकारात्मक लिच्वः जक लाःगु मखु कि थुकिं यानाः बजाःभाः नं मचायेक प्रभावित जुयावःगु खँ सीदुगु दु । लोडशेडिङया न्हूगु रुटिन सार्वजनिक जुइवं बजारय् न्याये दुगु मुस्याचिकं लिटरं १४० तका थ्यंगु दु । उकुन्हु तक थ्व १०६ तकां लानाच्वंगु
खः । अथे हे बजारय् घ्यःया भाः नं थहां वंगु दु ।
मत मदयाः गुलिखे उद्योगत धाःसा बन्द जुइगुअवस्थाय् नं थ्यनाच्वंगु खँ सीदुगु दु । लोडशेडिङया
जक कारणं मोरङ-सुनसरी लागाया न्यासः मध्यय् बिछ उद्योग बन्द जुइगु अवस्थाय् थ्यनाच्वंगु दु । यदि थ्व उद्योग बन्द जुल धाःसा अन ज्या याईपं २० हजारम्ह मजदूर प्रभावित जुइ ।
चले जुयाच्वंगु गुलिखे उद्योगय् नं मजदूर आन्दोलनं यानाः ज्या मजुयाच्वंगु खँ धाःगु दु ।
लोडशेडिङं यानाः देय्या औद्योगिक ख्यः तहसनहस जूगु खँ उद्योग मन्त्री अष्टलक्ष्मी शाक्यं नं स्वीकार
यानादीगु दु । वय्कलं औद्योगिक लागाय् लोडशेडिङया प्रभाव म्हो यायेगु लागिं औद्योगिक क्षेत्रय् बिस्कं मतया लाइन बीगु तयारी यानाच्वनागु खँ कनादिल ।
पोखराया औद्योगिक क्षेत्रय् स्थानीय स्तरं हे बिस्कं फिडर तयाः मत बीगु शुरु यायेधुंकूगु दु । आः हेटौंडा व वुटवल औद्योगिक क्षेत्रय् नं बिस्कं फिडर तयाः मत बीगु लागिं ज्या शुरु यायेत्यंगु दु ।
