बन्दं संविधानसभाया बैठक स्थगित
येँ (सन्ध्या टाइम्स)/एकीकृत नेकपा (माओवादी)या संयुक्त राष्ट्रिय जनआन्दोलन नेपालं कैलालीइ जूगु घटनायात कयाः थौं याःगु नेपाल बन्दं संविधानसभाया बैठक नं सुचं जक तिकाः स्थगित याःगु दु। सुचं जक बियाः संविधानसभाया बैठक स्थगित याःगु थ्वहे न्हापांखुसी खः। थौं सुथय् १०:३० ताः इलय् सःतातःगु खःसा तसकं म्हो जक सभासद्त थ्यंकः वःगुलिं सुचं तिकाः कन्हय् तकया निंतिं बैठक स्थगित याःगु खः ।
थौंया बैठकय् प्राकृतिक स्रोत तथा साधन बाँडफाँड समितिं न्ह्यब्वःगु प्रस्तावयात कयाः सहलह ब्याकेगु तयारी यानाच्वंगु खः ।
अथे हे थौं च्वनेगु धयातःगु संविधानसभा संवैधानिक समितिया बैठक नं नेपाल बन्दं यानाः स्थगित जूगु दु। उगु समितिया मुँज्या नं कन्हय् च्वनीगु जूगु दु। समितिया अध्यक्ष निलाम्बर आचार्य थौं सुथनिसें थःगु कार्यकक्षय् च्वनाच्वंगु खःसां कोरम मगाःगुलिं यानाः बैठक स्थगित याःगु खः। अथे हे थौं च्वनेगु धयातःगु व्यवस्थापिका संसदया बैठक नं स्थगित जूगु दु ।
