स्वन्हुया कारोबारय् नं नेप्से ११ अंकं कुहां वन
येँ (सन्ध्या टाइम्स)/थ्व वालय् नेपाल स्टक एक्सचेन्जय् मुक्कं स्वन्हुया निंतिं जक शेयर कारोबार जुल। थ्व स्वन्हुया दुने जूगु शेयर कारोबारं नेप्से ११ दशमलव ४४ अंकं कुहां वंगु दु। वाःया न्हापांगु न्हि ५२८ दशमलव ८९ अंकं शेयर कारोबार शुरु जूगु नेप्से कारोबारया लिपांगु न्हि ५१७ दशमलव ४५ अंकय् थ्यंकाः शेयर बजाः बन्द जूगु खः ।
थ्व वाःया स्वन्हुया दुने नं चय्निगू कम्पनीया २९६९ कित्ता शेयर न्याये-मी जुयाः झिंप्यंगू करोड न्हय्न्हय्गू लाख न्हय्न्याद्वः तका दां बराबरया कारोबार जुल। थ्व स्वयां न्ह्यः वंगु वालय् ४९१० कारोबारं नीन्हय्गू करोड ख्वीच्यागू लाख पीन्हय्द्वः तका दां बराबरया न्यागू लाख ख्वीनिद्वः कित्ता शेयर कारोबार जूगु खः ।
दांया ल्याखं थ्व वालय् 'क' वर्गय् लाःगु कम्पनीया जक न्हय्गू करोड ख्वीन्हय्गू लाख तका दांया कारोबार जुल। थ्व नेप्सेय् जूगु वाःया कूल कारोबारया ५१ दशमलव ९५ प्रतिशत खः ।
'क' वर्गया कारोबार मापन याइगु सेन्सेटिभ नं वाःया न्हापांगु न्हि १३० दशमलव २७ अंकं शुरु जुया वाःया लिपांगु न्हि ३ दशमलव ३५ अंकं कुहां वयेवं १२६ दशमलव ९२ अंकय् थ्यंगु दु ।
थ्व वाःया स्वन्हुया दुने नेप्सेय् जूगु कारोबारय् निगू करोड पीन्हय्गू लाख तका दां व नीछद्वः कित्ता शेयर न्याये-मी जूगु लिधंसाय् बैंक अफ काठमाण्डु व दकलय् अप्वः ४७० गू कारोबार याःगु लिधंसाय् प्राइम कमर्सियल बैंक दकलय् न्ह्यःने लाःगु दु ।
