बन्दं जनजीवन प्रभावित
कैलालीलय् शुक्रवाः जूगु घटनाया विरोधय् एनेकपा (माओवादीं) आइतवाः आह्वान याःगु नेपाल बन्दया कारणं देय्न्यंकया जनजीवन प्रभावित जूगु दु । बन्दया कारणं येँ नापं देय्या प्रमुख सहरया यातायात ठप्प जूगु दुसाः बजाः नं बन्द जूगु दु ।
येँया यातायात व बजाः ठप्प जुइवं चक्रपथ दुनेया प्राय थाय् सुनसान खनेदगु दुसाः माओवादी कार्यकर्तातय्सं थीथी थासय् टायर च्याकाः सतक अवरुद्ध यानाच्वंगु दु । अथेहे येँ पिने नं माओवादी थाय् थासय् अवरोध यानाः सवारी साधन चलेजुइ ब्यूगु मदुसाः बन्दया कारणं हे बजाः, शिक्षण संस्था, उद्योग, कलकारखाना दक्वं बन्द जूगु दु ।
माओवादीं कैलालीया डुडेझारीलय् सकुम्वासीतय् वस्तीइ निहत्था जनतातय्त गृहमन्त्री भीम रावलया आदेशय् गोलीं क्येकूगु द्वपं ब्यूसें बन्द घोषणा याःगु खः । सरकारं धाःसाः माओवादीं वन कब्जा यायेगु योजना कथं अतिक्रमणया यायेत स्वःगु खँ धाःगु दु ।
माओवादीं कैलली घटनाय् सीपिंत सहिद घोषणा यायेमाःगु, सीपिनि छेँजःयात क्षतिपूर्ति बीमाःगु, घाःपाः जूपिंत वासः याकेमाःगु माग याःगु दु । शुक्रवाःया घटनाय् सरकारं प्यम्ह सिगु खँ धाःगु दुसाः माओवादीं न्हय्म्ह सिगु दाबी याःगु दु ।
