डुडेझारी घटनाय् माओवादी हे जिम्मेवार : गृहमन्त्री
गृहमन्त्री भीम रावलं कैलालीया डुडेझारी घटनाय् एनेकपा (माओवादी) हे जिम्मेवार जूगु द्वपं बियादीगु दु । वयेकलं सुरक्षाकर्मीतय् संयमत व घैर्यताया कारणं म्हो जक मनूतय् ज्यान वंगु दाबी यानादिसें सुरक्षाकर्मीतय् प्रशंसा यानादीगु दु ।
शुक्रवाः जूगु डुडेझारी घटना बारे आइतवाः गृहमन्त्रालयलय् पत्रकार सम्मेलन यानाः वयेकलं शान्ति सम्झौतायात बचे यायेत सुरक्षाकर्मीतय्सं बल छ्यले माःगु धयादिल । वयेकलं शान्ति सम्झौता विपरीत ज्या जूगुलिं अनं उमित बल छ्यलाः चीकेमाःगु धयादिल ।
वयेकलं माओवादीया कारणं हे अन ल्वापू जूगु धयादिसें थुकीया जिम्मेवारी नं माओवादीं हे कायेमाःगु धयादिल । वयेकलं सुरक्षाकर्मीतय्सं टहरा चीकेत स्वःगु ईलय् सुकुम्वासीतय्सं हे सुरक्षाकर्मीतय्त सुनियोजित आक्रमण यायेवं सुरक्षाकर्मीतय्सं उकीया प्रतिकार स्वरुप बल छ्यःगु धयादिल ।
अथेहे वयेकलं सुरक्षाकर्मीतय्सं हवाई फायर यायेगु झ्वलय् स्वम्ह वन अतिक्रमणकारीत सीगु नं धयादिल । वयेकलं सुकुम्वासीतय् नांमय् माओवादी कायर्कतातय्सं कब्जा यानातःगु ५२५ विघा जमिनयात सरकार लितकयाः पाय्छी ज्या याःगु दाबी यानादिल ।
माओवादी भातृसंगठनया अगुवाइलय् डुडेझारी क्षेत्रया जंगलय् सुकुम्वासीतय्सं टहरा दयेकाः वन अतिक्रमण यायेवं शुक्रवाः सुरक्षाकर्मीतय्सं बल छ्यलाः चीकेत स्वःगु ईलय् प्रहरी व सुकुम्वासीत दथुइ ल्वापू जूगु खः ।
पत्रकार सम्मेलनय् गृहमन्त्री रवालं उगु घटनाय् छम्ह प्रहरी व मेपिं स्वम्ह जक सीगु दाबी याःगु दु । तर शनिवाः माओवादीं याःगु पत्रकार सम्मेलनय् रुपलाला डगौरा थारु, नरेन्द्र विक, संजय ढकाल, लट्के विक, इन्द्र विक व ललिता विक यानाः खुम्ह सर्वसाधारण सीगु जानकारी ब्यूगु खः ।
