कैलालीइ न्हिछि हे तनाव
कैलालीया बलियाय् च्वंगु बलचौर-डुडेझारी जंगलय् शुक्रवाः जूगु घटनायात कयाः शनिवाः न्हिछि हे लम्की क्षेत्र तनाव जूगु दु ।
लम्की चिसापनी राजमार्गया डुडेझारीलय् सुकुम्वासीतय्सं चान्हय् स्वता ईलं निसें सुथय् तक खुगः यात्रुवाहक बस व छगः ट्रकय् मि च्याका ब्यूगु दु । मि च्याका ब्यूगु यात्रुवाहक बस ना. ४. ख. १६४, ना. ४. ख. १०९२, ना. ३. ख. ५४८१, बा. १. ख. २५६९ व भे. १. ज. २१५ नापं ना. १. क. १९९२ नम्बरया ट्रक ध्वस्त जूगु दु । अथेहे ट्रक दुने दुगु झिंनिगः मोटरसाइकल लुटे यानायंकूगु दुसाः मेगू झिंनिगः मोटरसाइकल ट्रक नापं च्यानाः ध्वस्त जूगु दु ।
अथेहे अन न्हिछि सवारीसाधन चले जुइमफयाः शुक्रवाः प्रहरीया गोली लानाः सिम्ह खैलाड गाविसया रुपलाल नां जुम्ह खेमलाला डगौराया दाह संस्हार जुइमफुत । डगौराया सीम्ह न्हिछि हे राजमार्गय् तुं लानाच्वंगु खसां सवारीसधान चलेजुयाः अनं यंकेमफुगु खँ वयाः छेँजः नं धाःगु दु ।
प्रहरीया हे गोलीं लानाः सिम्ह नरेन्द्र विकया सीम्ह नं वयाः छेँजः नं कयायंकूगु मदुनी । सरकारं शुक्रवाःया हत्याकाण्डया बारे छुं मधातल्ले सीम्ह मयंकीगु खँ धाःगु दु ।
शनिवाः न्हिनय् तक सुकुम्वासीतय्सं वस्ती त्वताः मेथाय् हे वनेवं निद्वया ल्याख्य् दुपिं जनपथ व सशस्त्र प्रहरीं सुकुम्वासीतय्सं दयेकातःगु छेँय्त च्याका ब्यूगु खः ।
अथेहे माओवादीं शुक्रवाःया घटना विरुद्ध लम्कीलय् विरोधसभा याःगु दु । उगु सभाय् न्ववापिं नेतातय्सं सुकुम्वासीतय्त प्रहरी दमन याःगु धासें हत्यारातयात कारवाही यायेमाःगु, सरकारी दमन दिकेमाःगु, सिपिनि छेँजःयात क्षतिपूर्ति बीमाःगु, सिपिंत शहीद घोषणा यायेमाःगु, घाःपाः जूपिंत वासः यायेमाःगु लगायत माग याःगु दु ।
माओवादीं याःगु प्रदर्शनं शनिवाः कैलालीया जनजीवन तनावग्रस्त जूगु खः । उमिसं कैलालीया टीकापुर, धनगढी, अत्तरिया, लम्की लगायत बजाःत बन्द याकूगु खः । प्रदर्शनकारीतय्सं थीथी थासय् टायर च्याकाः प्रदर्शन याःगु खसाः अन सवारी साधन छगः नं चलेजुइमफुत ।
अथेहे कैलालीया लम्की बजाः पाखें शनिवाः माओवादीं सशस्त्र प्रहरी नायव निरीक्षक दीपेन्द्र पाण्डे व जनपद प्रहरीया हवलखर रामबहादुर रोकाययात अपहरण याःगु खः । माओवादीं निम्ह प्रहरीत थःत पत्रकार धयाः कार्यकर्ता दथुइ जुयाच्वंगु सहलहलय् वःगुलिं अपहरण यायेमा:गु खँ धाःगु दु । उमित लिपाः स्थानीय मानव अधिकारर्मीतय् रोहबरय् त्वःतुगु खः ।
