डुडेझरी काण्डय् सिपिं न्हय्म्ह थ्यन / माओवादीं आइतवाः नेपाल बन्द घोषणा
कैलालीया बलियाय् च्वंगु डुडेझारीलय् प्रहरी व सुकुम्वासीत दथुइ जूगु ल्वापुइ खुम्ह सुकुम्वासीत सीगु दाबी एनेकपा (माओवादीं) याःगु दु । शुक्रवाः जूगु ल्वापू छम्ह प्रहरी नं सीगु खः । ल्वापू प्रहरी व सुकुम्वासी यानाः सिपिनि ल्याः न्हय्म्ह थ्यंगु दु ।
माओवादीं निहत्था सुकुम्वासीतय्त दमन याःगु धासें आइतवाः नेपाल बन्दया घोषणा याःगु दु । अथेहे विरोध स्वरुप शनिवाः बहनी देय्या थीथी थासय् मसाल जुलुस पिथंगु दु ।
माओवादी पाखें गठित संयुक्त राष्ट्रिय जनआन्दोलन समिति व पार्टी पाखें दीनानाथ शर्मां ब्यागलं ब्यागलं प्रेस विज्ञप्ति जारी यानाः आइतवाः नेपाल बन्दया घोषणा याःगु खः । विज्ञप्तिइ तःधंगु ल्याख्य् प्रहरी परिचालन यानाः सुकुम्वासी वस्तीइ मि च्याकाः, दायाः, बलत्कार व अन्धाधुन्ध गोली प्रहार याःगु व उगु ईलय् खुम्ह सर्वसाधारण सीगु खँ न्ह्यथेंसें सिपिंत सहीद घोषणा, क्षतिपूर्ति व घाःपाः जूपिंत वासः यायेमाःगु माग याःगु दु ।
माओवादीं धाः कथं खुम्ह सिपिं सर्वसाधारणय् रुपलाला डगौरा थारु, नरेन्द्र विक, संजय ढकाल, लट्के विक, इन्द्र विक व ललिता विक दु । शुक्रवाः हे ल्वापूइ लानाः प्रहरी जवान पद्म ऐडी नं सीगु खः । अथेहे माओवादीं प्ररहीया दुर्व्यवहार व हातपातं यानाः गर्भवती विन्द्र विक गम्भीर घाःपाः जूगु दाबी याःगु दु ।
अथेहे विज्ञप्तिइ कैलाली हत्याकाण्ड पाखें देशय् राष्ट्रपति शासन व सैनिक तानाशाहीया लागू यायेगु गुरुयोजन जूगु व परिर्वतनकामी व क्रान्तिकारी जनसमुदायया आमसंहार यानाः विदेशीतय कतामरी सरकारया शासन ताःहाकेगु कुतः जूगु आशंका याःगु दु ।
नापं विज्ञप्तिइ थुगु घटनां जनताया म्वाये दइगु नैसर्गिक मानवअधिकारय् तप्यंक हस्तक्षेप याःगु खँ न्ह्यथंसें थुकीं जुइफुगु राजनीतिक दुर्घटनाया पूर्वसंकेत व शान्ति सम्झौताया उल्लंघन याःगु खँ धयातःगु दु ।
अथेहे शनिवाः हे जनआन्दोलन समितिया महासचिव व पार्टी स्थायी समिति दुजः नेत्रविक्रम चन्दं पार्टी मुख्यालयलय् पत्रकार सम्मेलन यानाः गृहमन्त्री भीम रावलया आदेशय् थ्व हत्याकाण्ड जूगु दाबी यानादिसें गृहमन्त्री रावलयात कारवाही यायेत नं माग यानादीगु दु ।
