फोरम पाखें आन्दोलनया घोषणा
संविधानसभाय् पार्टीया भूमिका सिध:गु ठहर यासें मधेशी जनअधिकार फोरमं स्वायत्त मधेश प्रदेश कार्यान्वयन यायेत शनिवाः निसें स्वंगूगु मधेश आन्दोलन शुरु जूगु खँ धाःगु दु । फोरमया नेतातय्सं थुगु आन्दोलनं संघीयता, प्रादेशिक स्वायत्तता व गणतन्त्रयात ग्वाहालि जुइगु दाबी याःगु दु ।
विराटनगरय् शनिवाः क्षेत्रीय विरोधसभाय् न्ववानादिसें फोरम अध्यक्ष उपेन्द्र यादवं स्वायत्त मधेश प्रदेश स्थापनाया निंतिं संयुक्त मधेशी मोर्चा बल्लाकेमाःगु धयादिसें सरकार त्वताः आन्दोलनय् वयेतं तमलोपा व सद्भावना पार्टीयात इनाप यानादिल ।
वयेकलं मधेश प्रदेश स्थापना मजूतल्ले आन्दोलन मदिकेगु ख्याच्वः नं बियादिल । वयेकलं निगूगु मधेश आन्दोलनया झ्वलय् सरकार नाप जूगु सहमतिलय् स्वायत्त मधेश प्रदेश हे च्वयातःगु दाबी यानादिसें सरकारं सम्झौता पूवंके बेइमानी याःगु द्वपं बियादिल ।
यादवं सरकारं मधेशी जनता नाप माफी फ्वनाः उपराष्ट्रपति परमानन्द झायात सम्मानपूर्वक क्रियाशील मयासाः निगूगु चरणया आन्दोलन सशक्त यायेगु धयादिल ।
अथेहे सभाय् फोरमया सह अध्यक्ष जयप्रकास गुप्तां स्वंगू मधेश आन्दोलनया न्हापांगु चरण पुस २ गते तक क्षेत्रीय विरोधसभा यायेगु व उगु ईलय् तक नं सहमति कार्यान्वयन मजुसाः आमहड्ताल तकया विरोध ज्याझ्वः यायेगु ख्याच्वः बियादिल । वयेकलं संविधानसभाया औचित्य समाप्त जूगु व सरकारय् फोरम मवनीगु खँ पाटीं निर्णय याये धुंकूगु कनादिल ।
