टहरा चीकेगु झ्वलय् ल्वापू / छम्ह प्रहरी नापं स्वम्ह सित
कैलालीया बलिया गाविसय् च्वंगु डुडेझारीलय् वन अतिक्रमण यानाः देयेकातःगु टहरा चीकेगु झ्वलय् जूगु ल्वापुइ लानाः छम्ह प्रहरी नापं स्वम्ह सीगु दु ।
सुदूरपश्चिम क्षेत्रीय प्रहरी ज्याकूया कथं ल्वापूइ लानाः सेती अञ्चल प्रहरी ज्याकूथी कार्यरत जवान पदम ऐर व सुकुम्वासी पाखे नरेन्द्र विश्वकर्मा व संजय ढकाल सीगु दु । विश्वकर्मा घटनास्थलय् हे मदुगु खःसाः ढकालयात मेडिकल कलेजय् वासः याकेत यंकाच्वंगु ईलय् मदुगु खः ।
डुडेझारी वनय् अतिक्रमण यानाः च्वनाच्वंपिं माओवादी निकट सुकुम्वासीतय्त चीकेत प्रहरीं बल छ्यलेवं ल्वापू शुरु जूगु खः । ल्वापूइ प्रहरी व सुकुम्वासीत यानाः स्वीम्हं मल्याक घाःपाः जूगु दु । घाःपाः जूपिं प्रहरी नायव निरीक्षक कल्याणिसंह महरा, जवान सिके खड्का व देवसिंह विष्टया अवस्था गम्भरी दु । गम्भीर घाःपाः जुम्ह महरायात वासः याकेत लखनउ यंकूगु दुसाः मेपिंत सेती अञ्चल अस्पतालय् वासः याकातःगु दु ।
वंगु शनिवाः निसें अन माओवादी निकट सुकुम्वासी संघया ब्यानर तयाः च्वनाच्वंपिंत बस प्रयोग यानाः चीकेगु निर्णय वन ज्याकूथीया इनापय् स्थानीय प्रशासनं याःगु खः । सुकुम्बासी चीकेगु निर्णयया प्रचार प्रसार याःसां सुकुम्वासीत अनं मवनेवं प्रहरीया ग्वाहालिइ जिल्ला प्रशासनं टहरा बल छ्यला चीकेगु कुतः याःगु खः । टहरा चीकेगु कुतः यायेवं हे सुकुम्वासीतय्सं प्रतिवाद याःगु खः ।
प्रहरीं सुकुम्वासीतय्त घेरावन्दी यानाः चीकेत स्वःगु ईलय् सुकुम्वासीतय्सं प्रतिकार यायेवं प्रहरीं अश्रुग्यास प्रहार याःगु खः । लिपाः प्रदर्शनकारीतय्सं घरेलु ल्वाभः व अप्पां क्येकेवं प्रहरीं गोली चले याःगु खः ।
प्रहरीया गोलीं सुकुम्वासी भीमबहादुर थापा व गोपाल विकया घाःपाः जूगु दुसाः सुकुम्वासीतय् घरेलु ल्वाभःया प्रहारं प्रहरी नायव निरीक्षक महरा गम्भीर घाःपाः जूगु दु । धनगढीया प्रहरी उपरीक्षक उत्तमबहादुर सिंहं सुकुम्वासीतय्सं हे न्हापा गोलीं क्येकूगु खँ धाःगु दुसाः माओवादीं थुकीया खण्डण यासें थुकीयात सुनियोजित प्रचार धाःगु दु ।
लिपा प्रहरी अनं लिहां वनेधुंकाः सुकुम्वासीतय्सं इलाका वन ज्याकू लम्की च्याका ब्यूगु दु । अथेहे उगु घटनायात कयाः धनगढीलय् वाइसीएलं कृषि विकास ज्याकूया बा. १. झ. ६५५८ नम्बरया जीप व पशु सेवा ज्याकूया मोटरसाइक च्याकाः ब्यूगु दु । नापं सुकुम्वासीतय्सं अत्तरियालय् नेपाल टेलिकमया म. १. ज. ६० नम्बरया जीप च्याकाब्यूगु दु ।
