राज्य पुनर्संरचनाय् एमालेया स्वंगू अवधारणा
येँ (सन्ध्या टाइम्स)/संविधानसभाया राज्य पुनरर्संरचना नापं राज्य शक्ति बाँडफाँड समितिइ एमालेया स्वम्ह सभासदतय्सं स्वखे स्वःगु स्वंगू प्रस्तावया लिसें पार्टीया छगू नापं याना प्यंगू प्रस्ताव दर्ता याःगु दु ।
म्हिगः तकया दुने १०७ क्वः तक मुँज्या च्वने धुंकूगु समितिइ झिंखुगू हे दलं राज्य पुनरर्संरचनयात कयाः थःपिनिगु पार्टीगत धारणा दर्ता याये धुंकूगु दु। झिंखुगू दलं झिंखुगू अवधारणा नापं व्यक्तिगत रुपं एमालेया डा. मंगलसिद्धि मानन्धर, शंकर पोखरेल व लक्की शेर्पां बिस्कं प्रस्ताव दर्ता यानादीगु दुसा नेपाली कांग्रेसया नरहरि आचार्य व मधेशी जनअधिकार फोरम (लोकतान्त्रिक)या सर्वदेवप्रसाद ओझां नं थःगु व्यक्तिगत प्रस्ताव तयादीगु दु।
एमालेया डा. मानन्धरं व्यक्तिगत रुपं दर्ता यानादीगु प्रस्ताव व पार्टीगत रुपं दर्ता याःगु प्रस्तावय् खास हे मपाः। उगु प्रस्तावय् जाति, भाषा, ऐतिहासिकता, बसोवास निरन्तरता नापं फुक्क पक्षयात ध्यानय् तयाः नेवाः राज्य दइगु कथंया खँ तयादीगु दुसा एमालेया नेता पोखरेलं १४ अञ्चलयात हे आधार कयाः क्षेत्रीयताया आधारय् गणराज्य दयेकेमाः धकाः प्रस्ताव तयादीगु दु। अथे हे एमालेया मेम्ह सभासद् शेर्पां मिसा अधिकारयात प्राथमिकता बियाः गणराज्य दयेकेमाः धइगु कथंया प्रस्ताव तयादीगु दु ।
