३० गतेनिसें स्थानीय निकाय ठप्प
येँ (सन्ध्या टाइम्स)/स्थानीय निकाय संयुक्त आन्दोलन केन्द्रीय समन्वय समितिं निर्णायक आन्दोलन धकाः स्वंगूगु चरणया आन्दोलन घोषणा यानाः कंसंनिसें स्थानीय विकास मन्त्रालयपाखें वयाच्वंपिं स्थानीय निकायया प्रमुख जुयाच्वंपिं कर्मचारीतय्त लितछ्वयेगु घोषणा याःगु दु।
पेशागत सेवा सुरक्षा यायेमाःगु, २०६५ साल असार तकया दुने नियुक्त जूपिं फुक्क कर्मचारीतय्त स्थायी यायेमाःगु आदिं थीथी माग न्ह्यब्वयाः आन्दोलन याना वयाच्वंपिं कर्मचारीतय्सं कंसंनिसें स्थानीय निकायया प्रमुखतय्गु क्वथाय् तालं ग्वयेगु, मंसीर ३० गतेनिसें फुक्क स्थानीय निकाय गाविस, जिविस, नगरपालिका, उपमहानगरपालिका व महानगरपालिका बन्द यायेगु व पुष ५ गतेनिसें स्थानीय निकायया अत्यावश्यक सेवा तकं बन्द यायेगु घोषणा याःगु दु ।
एकिकृत माओवादी, नेपाली कांग्रेस, एमाले नापं थीथी दललिसे स्वापू दुगु स्थानीय निकायया न्यागू कर्मचारी संगठनपाखें मंकाः संघर्ष याना वयाच्वंगु खः ।
