राज्य पुनर्संरचनायात कयाः न्हूगु प्रस्ताव
येँ (सन्ध्या टाइम्स)/एकिकृत नेकपा (माओवादी)या न्ह्यानाच्वंगु स्थयी समितिया मुँज्याय् स्थायी समितिया दुजः नापं जातीय क्षेत्रीय महासंघया नायः देव गुरुङं नेपाःयात राज्य पुनर्संरचना यायेबलय् जातिया आधारय् मखुसे राष्ट्रियताया आधारय् यायेमाःगु प्रस्ताव तयादीगु खँ सीदुगु दु ।
माओवादीया राज्य पुनर्संरचनाया बैठकय् अन्ध जातिवादी जुलकी समस्या ब्वलनेफु धकाः पार्टीइ दुने वय्कलं म्हिगः च्वंगु स्थायी समितिया बैठकय् थ्व प्रस्ताव तयादीगु सीदुगु दु ।
नेता गुरुङं माओवादीं घोषणा यायेगु जातीय राज्यत राष्ट्रियताया आधार नापं क्षेत्रया आधार कथं प्रस्ताव यानादीगु खँ माओवादीया छम्ह नेतां 'सन्ध्या टाइम्स' यात जानकारी बिउगु दु ।
भाजु गुरुङं थःगु प्रस्ताव न्ह्यब्वयेगु झ्वलय् नेवाः, तामाङ, गुरुङ, लिम्बु, राई नापं थीथी राज्यया आधार जातीय घोषणा यायेगु मखुसें राष्ट्रया आधारय् राज्यत दयेकेगु प्रस्ताव तयादीगु दु ।
माओवादी स्रोतं धाः कथं पार्टी दुने व पिने नं जातीय आधारय् राज्य दयेकेगु नापं सिमाना क्वःछीगु खँय् कचवं पिहां वःगुलिं वय्कलं थ्व न्हूगु प्रस्ताव तयादीगु खँ सीदुगु दु।
माओवादी थःगु स्वक्वःगु चरणया आन्दोलनया झ्वलय् थीथी स्वायत्त राज्य घोषणा यायेगु ज्याझ्वः दयेकातःगु दु ।
