'संविधान ईलय् हे निर्माण जुइमखु'
नेपाली कांग्रेस संसदीय दलया नेता रामचन्द्र पौडेलं संविधान ईलय् निर्माण जुइमफइगु खँ धयादीगु दु ।
नेपाल प्रेस युनियन स्याङ्जां शुक्रवाः वालिङय् याःगु पत्रकार सम्मेलनय् वयेकलं निर्धारित ईलय् हे संविधान निर्माण मजुइगु आः निश्चित जूगु धयादिल । वयेकलं शान्ति प्रकृया क्वचायेकीगु व संविधान निर्माण नापं यायेमाःगुलिं निर्धारित ईलय् हे संविधान निर्माण यायेमफइगु धयादिल ।
राज्यया पुनःसंरचना व माओवादी लडाकुया समायोजन व पुनःस्थापना मयातेल्ले न्हूगु संविधान जारी मजुइगु वयेकलं दाबी यानादिल । वयेकलं माओवादीया ल्वाभः व्यवस्थापन मयायेकं संविधान जारी याःसा देशय् तःधंगु दुर्घटना जुइगु धयादिल ।
वयेकलं माओवादीं ल्ह्वनाच्वंगु नागरिक सर्वोच्चताया नाराया छुं अर्थ मदुगु धयादिसें माओवादीं देशय् अनावश्यक नारा बियाः द्वन्द्व ब्वलंकाच्वंगु धयादिल । वयेकलं माओवादीयात लोकतन्त्र व शान्ति प्रकृया
प्रति गम्भीर जुयाः देय्या समस्या समाधान यायेत नं इनाप यानादिल ।
