कालापत्थरय् मन्त्रिपरिषदया बैठक क्वचाल / सगरमाथा घोषणपात्र जारी
समुद्री सतह स्वयां झिंन्हय्द्वं फिट च्वय् लाःगु कालापत्थरय् शुक्रवाः च्वंगु मन्त्रिपरिषदया बैठक झिगू बुँदे सगरमाथा घोषणापत्र जारी यासें क्वचाःगु दु । बैठक मुकं नीगू मिनेट जक च्वनीगु धाःसां मौसमं साथ ब्यूगुलिं बैठक एक घण्टा च्वंगु खः ।
वातावरणीय परिवर्तनया असर बारे विश्वया ध्यानाकर्षण यायेत सगरमाथाया आधार शिविर स्थित ५२४२ मिटर उचाइलय् दुगु कालापत्थरय् च्वंगु बैठकं दार्चुलाया अपिनाम्पा संरक्षण क्षेत्र, रामेछाप व दोलखाया गौरीशंकर संरक्षण क्षेत्र व बर्दिया राष्ट्रिय निकुञ्जयात अप्वयेकीगु व बाँके राष्ट्रिय निकुञ्ज संचालन यायेगु निर्णय याःगु दु ।
प्रधानमन्त्री माधवकुमार नेपालं बैठकय् न्ववानादिसें कार्बन उत्सर्जन याइगु देय्तय्त उकीयात म्हो यायेत इनाप यानादिल । वयेकलं हिमाली राष्ट्रया जलवायु परिवर्तन विरुद्ध छप्पँ जुइमाःगु आवश्यकताय् नं बः बियादिल ।
बैठकं जारी याःगु झिगू बुँदे घोषणापत्रय् जलवायु परिवर्तय् सामूहित प्रतिवद्धता क्यनेगु, जनचेतना अप्वयेकीगु, संरक्षण क्षेत्र अप्वयेकीगु, जलवायु परिवर्तनबारे गरीव, दलित, आदिवासी व सीमान्तकृत वर्गया समूदाययात जनचेतना, सूचना प्रविधिया क्षमता अभिवृद्धि यायेगु लगायतया दु ।
सोमवाः निसें डेनमार्कया कोपनहेगनय् जुइत्यंगु जलवायु परिवर्तन सम्बन्धी झिंन्याक्वःगु 'कोप १५' सम्मेलन जुइ न्ह्यः विश्वया ध्यानाकर्षण यायेत सगरमाथाया आधार शिविरय् मन्त्रिपरिषदया बैठक च्वंगु खः ।
बैठक लिपाः कालापत्थरय् च्वंगु मन्त्रिपरिषदया बैठकया बारे स्याङबोचेय् पत्रकार सम्मेलन यानाः जानकारी ब्यूगु खः । पत्रकार सम्मेलनय् ब्वति कायेत देय् दुने व पिनखया यानाः च्यय्म्ह स्वयां अप्वः पत्रकारत स्याङबोचे थ्यंकूगु खः । नेपाल टेलिभिजन लगायत छुं विदेशी टेलिभिजन च्यानलं बैठकया प्रत्यक्ष प्रसारण नं याःगु खः ।
बैठकय् ब्वति कायेत कालापत्थर वने न्ह्यः प्रधानमन्त्री नापं नीस्वम्ह मन्त्रीतय् स्वास्थ्य परीक्षण याःगु खःसा दक्विसंया हिलय् अक्सिजनया मात्रा सन्तोषजनक जुइवं हेलिक्पटरय् तयाः कालापत्थर यंकूगु खः ।
(किपा साभार :- एपी)
