पार्टी दुने छुं विवाद मदुगु खनाल व ओलीया दाबी
नेकपा (एमाले)या अध्यक्ष झलनाथ खनाल व एमाले वरिष्ठ नेता केपी शर्मा ओलीं पार्टी दुने छुं नं कथंया विवाद मदुगु खँ धाःगु दु ।
एमाले मोरङया खुक्वःगु जिल्ला अधिवेशन ज्याझ्वलय् ब्वति कायेत छगू हे विमानय् च्वनाः विराटनगर थ्यंकादीपिं खनाल व ओलीं पत्रकारत नाप खँल्हाबंला यासें पार्टी दुने सामान्य मतभेद जुइगु स्वभाविक जूगु धासें पार्टी दुने छुं विवाद मदुगु दाबी याःगु खः ।
छुं ई न्ह्इः निसें पार्टी अध्यक्ष खनाल व पार्टी वरिष्ठ नेता ओली दथुइया स्वापूया बारे थीथी संचार माध्यमय् चर्चा जूगु खःसा वयेपिं स्वयम नं थीथी सावर्जनिक ज्याझ्वलय् छम्हं मेम्हेसित द्वपं बीगु ज्या यानावयाच्वंगु खः ।
खनालं पत्रकारत नाप आक्रोश प्वंकादिसें संचारकर्मीतय्सं पार्टी कुचाथलेत स्वःगु द्वपं बियादिल । वयेकलं संचार माध्यमय् खः हे मखुगु बुखँत प्रकाशित जूगुलिं थः दुःखी जूगु कनादिल । अथेहे नापं दीम्ह नेता ओलीं धयादिल, - 'झी नापं थन थ्यंगु दु, पार्टी दुने विवाद मदुगु दसु थ्वहे खः ।' वयेकलं एमाले दुने चीचीधंगु मतभेद जुइगु स्वभाविक जूगु नं धयादिल ।
