थुकथं जुयाच्वंगु दु, सगरमाथाय् मन्त्रिपरिषदया बैठकया तयारी
सुरेश मानन्धरपाखें
स्याङ्बोचे, लुक्ला (सन्ध्या टाइम्स)/ विश्वय् ब्वलना वयाच्वंगु जलवायु परिवर्तनया बारे विश्वयात सन्देश बीगु कथं कन्हय् सगरमाथा हिमालया मुलय् च्वनेत्यंगु मन्त्रिपरिषदया बैठकय् ब्वति कायेगु निंतिं उप प्रधानमन्त्री विजयकुमार गच्छदार, सुजाता कोइराला व सूचना तथा सञ्चारमन्त्री शंकर पोखरेल थौं सुथय् हे लुक्लाय् थ्यने धुंकूगु दु ।
अथे हे बैठकय् ब्वति कायेगु निंतिं प्रधानमन्त्री माधव नेपाल व मेमेपिं मन्त्रीत नं थौं बहनी तकया दुने थन थ्यंकः वयेगु निंतिं तयारी जुयाच्वंगु दु ।
थुगु मन्त्रिपरिषदया बैठकय् ब्वति कायेत २४ म्ह मन्त्रीत वइगु ज्याझ्वः दु ।
प्रधानमन्त्री लुक्लाय् थ्यनेवं वय्कः थनया हे दकलय् नांजाःगु होटल लाभिला शेर्पानी तयेगु तयारी जुयाच्वंगु दु। झिंनिकू क्वथा दुगु उगु होटलया ६ नम्बर क्वथाय् प्रधानमन्त्री च्वनेगु व्यवस्था यानातःगु दु। उगु क्वथां सगरमाथाया पूवंक दृष्य खनेदइ ।
कन्हय् सुथय् ९:३० बजे स्वयां न्ह्यः प्रधानमन्त्री लगायत सकलें मन्त्रिपरिषदया दुजःतय्त दकलय् न्हापां हेलिकप्टरं १२ हजार ५ सय फिट च्वय् लाःगु स्याङ्बोचे यंकी। अन थ्यनेवं दकलय् न्हापां चिकित्सकतय्सं मन्त्रिपरिषदया सकलें दुजःतय्गु स्वास्थ्य परीक्षण यायेगु ज्या याइ। अनं लिपा मन्त्रिपरिषदया बैठक च्वनीगु थाय् १७ हजार १ सय ९२ फिट च्वय् लाःगु गोरखसीपय् यंकीगु ज्याझ्वः दु।
मन्त्रिपरिषदया बैठक च्वनीगु थासय् प्रधानमन्त्रीया लिउनेसं सगरमाथा लाइगु कथं प्रमया सिटया व्यवस्था यानातःगु दुसा प्रम लिउने मन्त्रिपरिषदया बैठक धकाः च्वयातःगु ब्यानर ब्वयातःगु दइ ।
पाय्छि ९:३० ता इलय् मुख्य सचिव माधव घिमिरें मन्त्रिपरिषदया बैठकय् प्रस्ताव न्ह्यब्वयादीसा उगु प्रस्तावयात मन्त्रिपरिषदया दुजःत सकसिनं पारित याइ। थुकथं मन्त्रिपरिषदया बैठक क्वचाइ ।
बैठक क्वचायेवं प्रम लगायत मन्त्रीत सकसितं हाकनं स्याङ्बोचें तुं लित हइ। अनं लिपा पत्रकार सम्मेलन याइगु ज्याझ्वः दु ।
मन्त्रिपरिषदया बैठकय् ब्वति कायेकेत आपालं राष्ट्रिय व अन्तर्राष्ट्रिय पत्रकारतय्त अन यंकातःगु दुसां नं मन्त्रिपरिषदया बैठक जुइगु थासय् धाःसा फोटो पत्रकारतय्त यंकेगु तयारी जुयाच्वंगु दु ।
मन्त्रिपरिषदया बैठकय् ब्वति कायेत वनीपिं प्रम लगायत सकलें मन्त्रीत नेपाःया राष्ट्रिय वसः पुना मवंसें ट्रेकिङ वनीगु वसतय् वनी। अन बैठकय् ब्वति काइपिं मन्त्रीत सकसितं अक्सिजन तयेकीगु खँ ग्वसाःखलकं धाःगु दु ।
हाकुगु ध्वाँय् क्यन धाःसा कारबाही
सगरमाथाय् जुइगु मन्त्रिपरिषदया बैठकय् ब्वति कायेत प्रधानमन्त्री लगायत मन्त्रिपरिषदया सकलें दुजःत थन वइगु जुइव थनया सुरक्षा व्यवस्था नं कडा यानातःगु दु।
थन म्हिगः निसें आपालं नेपाली सेनाया लिसें प्रहरी नं परिचालन यानातःगु दु। प्रधानमन्त्री लगायत मन्त्रीतय्त माओवादी कार्यकर्तापाखें विरोध स्वरुप हाकुगु ध्वाँय् क्यने फइगु आशंकाय् थुकथं सुरक्षा व्यवस्था कडा याःगु खः।
थ्वहे झ्वलय् सीदु कथं थनया जनताया छेँय् हाकुगु ध्वाँय् खनेदत धाःसा शान्ति सुरक्षा अन्तर्गत कारबाही यायेगु ख्याच्वः नं सुरक्षा निकायं बियातःगु खँ स्थानीय जनतां धाःगु दु ।
