यशोधर महाविहारया जिर्णोद्वार क्वचाल
यल (सन्ध्या टाइम्स)/यलया बूबहालय् निर्माण जुयाच्वंगु यशोधर महाविहारया जिर्णोद्वारया ज्या क्वचाःगु दु ।
यल जिल्लाय् हे झिंनिगूगु शताब्दीइ निर्माण जूगु विद्याधर संस्कारित यशोधर महाविहारया जिर्णोद्वारया निंतिं करीब पीगु लाख तका दांया लागतय् जिर्णोद्वार क्वचाःगु खँ यशोधर महाविहार क्वाःपाःद्यः जिर्णोद्वार समितिं जानकारी बिउगु दु।
जिर्णोद्वार क्वचाःगु लसताय् म्हिगः नामसंगीति पाठ, दाफा भजन, स्तोत्र पाठ, ज्ञानमाला भजन लगायतया ज्याझ्वः जूगु खः ।
विहारया चक्रेश्वर आजु गणेशराज वज्राचार्यया उपस्थितिइ जूगु समापन ज्याझ्वलय् येँ, यल, ख्वप लगायातया विहारया पञ्चस्थविर,दशस्थविर व द्वादशस्थविर नापं निसःम्हेसित मंकाः पंचदान व सहभोजन याकेगु ज्या नं जूगु खः ।
ज्याझ्वलय् समितिया नायः बाबुराज वज्राचार्यं आर्थिक व प्रगति प्रतिवेदन न्ह्यब्वयादीगु खः ।
