थनिंनिसें पेट्रोल आपूर्ति
येँ (सन्ध्या टाइम्स)/थीथी सेवा सुविधा सहितया माग तयाः आन्दोलनय् कुहां वःपिं नेपाल पेट्रोलियम मजदुरलिसे जूगु सहमति लिपा थनिंनिसें पेट्रोल आपूर्ति सहज जूगु दु।
निगमया डिपोय् गाक्कं पेट्रोल लगायतया इन्धन दुगुलिं देय्या दक्वं पेट्रोल पम्पं पेट्रोलियम पदार्थया वितरण जुइगु खँ नेपाल पेट्रोलियम डिलर्श एशोसियसनं जानकारी बिउगु दु।
तर थनिंनिसें इन्धन सहज रुपं आपूर्ति जूसां वंगु छवाः न्ह्यः निसें पेट्रोलियम पदार्थ ढुवानी मजूगु व आपालं सवारी साधनं नं पेट्रोल कायेमखंगुलिं पेट्रोल पम्पय् आः दयाच्वंगु चाप म्हो जुइत व पेट्रोल वितरण सामान्य स्थितिइ थ्यनेत छन्हु निन्हुया ई काइगु नं एशोसियसनं न्ह्यथंगु दु ।
पेट्रोलियम मजदुरतय्सं सेवा सुविधा बृद्धि, न्हापा जूगु सहमतियात कार्यान्वयन यायेमाःगुया लिसें थीथी माग तयाः वंगु छवाः न्ह्यवंनिसें देय्न्यंकंया पेट्रोल पम्प बन्द यानाः विक्री वितरण ठप्प यानाबिउगु खः ।
