प्रधाममन्त्री सहित नीप्यम्ह मन्त्रीत लुक्लाय्
सगरमाथाया कालापत्थरय् मन्त्रिपरिषदया बैठकय् ब्वति कायेत प्रधानमन्त्री माधवकुमार नेपाल सहित नीप्यम्ह मन्त्रीत सगरमाथाया आधार क्षेत्र थ्यंकूगु दु । ५२४२ मिटरया उचाइलय् दुगु कालापत्थय् जुइगु बैठक न्ह्यः हे अनया मौसमया बारे थुइकेत छन्हु न्ह्यः हे लुक्ला थ्यंकूगु खः ।
प्रधानमन्त्री सहित मन्त्रीत थौं लुक्लाय् हे च्वनीगु ज्याझ्वः दु । शुक्रवाः मन्त्रीतय् स्वास्थ्य परीक्षण लिपाः जक कालापत्थर वनीगु खँ दु । मन्त्रीतय्त लुक्लां श्री एयरया एमआइ सेभेन्टिन हेलिकप्टरं कालापत्थर यंकी । मन्त्रिपरिषदया बैठक नीगू मिनेट जक च्वनीगु खँ स्रोतं धाःगु दु ।
प्रधानमन्त्री व मन्त्रीत नापं उच्चस्तरीय सरकारी अधिकारीत व चिकित्सकत नं लुक्ला थ्यंकूगु दु । तर रक्षामन्त्री विद्या भण्डारी, आपूर्ति मन्त्री राजेन्द्र महतो व विज्ञान व प्रविधि राज्य मन्त्री इन्द्र ढुङगेल स्वास्थ्यया कारणं कालापत्थर बैठकय् ब्वति मकाइगु खँ सीदुगु दु ।
जलवायु परिवर्तन बारे विश्वया ध्यानाकर्षण यायेगु ताः तयाः विश्वया दकलय् तजाःगु थासय् मन्त्रिपरिषदया बैठक यायेत्यंगु खः । शुक्रवः सुथय् झिताः ईलय् मन्त्रिपरिषद्या बैठकं दार्चुला अपिनाम्पा संरक्षण क्षेत्र, रामेछाप व दोलखाया गौरीशंकर संरक्षण क्षेत्र व बर्दिया राष्ट्रिय निकुञ्ज घोषणा याइगु ज्याझ्वः दु ।
